Россия президенти лавозимига даъвогарлик қилаётган икки номзод 30 январь куни сайловолди кампаниясидан чиқишини билдиришиб, амалдаги президент Владимир Путинни дастаклашга чақиришди.
“Россия умумхалқ иттифоқи” (РОС) партияси лидери Сергей Бабурин ўз номзодини дастаклаш учун йиғилган имзоларни Марказий сайлов комиссиясига топшириши биланоқ ўз номзодини сайловдан олиб қўйишини билдирган. Бабурин нима учун имзо йиққанига изоҳ берган эмас. У сайловчиларни “Путин номзоди атрофида бирлашиш”га чақирган.
Миллатчи-империячи Бабурин 2018 йилдаги президент сайловида ҳам иштирок этган ва ўшанда номзодлар орасида охирги ўринни эгаллаган эди. “Эхо Москви” радиосининг собиқ бош муҳаррири Алексей Венедиктов иддаосича, бу сафар унга “президентга бериладиган овоздан қиттак фоизига ҳам эга чиқмасликни юмшоққина тарзда тавсия қилишган”.
Аввалроқ Ирина Свиридовани президентликка номзод ўлароқ кўрсатган Демократик партия вакиллари унинг номзод ўлароқ рўйхатдан ўтиш учун зарур бўлган 100 минг имзони йиғи олмагани, шунинг учун ҳам кампаниядан чиқишини билдиришган. Свиридова ҳам Путинни қўллаб-қувватлашга чақирган.
Шу тариқа президентликка даъвогарлик қилаётган сони тўққиз нафарга тушган. Бешинчи муддатга номзодини қўяётган Путин дохил тўрт нафар номзод шу пайтгача МСК рўйхатига олинган, яна бир номзод - Сергей Малинкович МСКга ҳужжат топширган. Украинадаги урушни якунлаш ташаббуси билан чиққан Борис Надеждин дохил яна тўрт нафар номзодда Марказий сайлов комиссиясига ўз номзодини қўлловчи имзолашни топшириш учун 31 январь оқшомигача вақт бор.
Россиянинг амалдаги президенти Владимир Путин давлат раҳбари лавозимига бешинчи марта ўз номзодини қўймоқда. Экспертлар танқидига сабаб бўлган Конституцияга киритилмиш ўзгартишлар туфайли Путин бешинчи (ва олтинчи) марта президент этиб сайланиш ҳуқуқига эга бўлган. Биринчи марта у мазкур лавозимни 2000 йилда эгаллаган эди. Россияда президент сайловида овоз бериш жараёни 2024 йилнинг 15 мартидан 17 мартигача давом этади.
Россиядаги сайловлар мустақил кузатувчи ва экспертлар томонидан “эркин бўлмаган” ва “ноҳалол” сайловлар сифатида баҳоланиб келади. Расмий муттасил равишда сайлов жараёнига аралашиб келишади, мухолифатчи номзодларга халақит беришиб, ҳукуматпараст номзодлар учун имтиёзлар яратишади, қатор ҳолатларда бевосита сайлов натижалари сохталаштирилгани ҳам кузатилган.