Россиядаги колонияда жазо муддатини ўтаётган “Ватандош” ўзбеклар жамияти раиси Усмон Баратовга нисбатан янги жиноят иши қўзғатилди. Эндиликда у колония иши тартиб-интизомини бузишда айбланмоқда. Бу ҳақда Баратовнинг Sota.Vision нашри томонидан ёйинланган хатида айтилган.
Иш очилиши учун Валдай шаҳридаги жазо колониясида ишлайдиган отряд бошлиғининг аризаси сабаб бўлган. Мазкур аризада Баратов жазо изоляторининг туйнуги орқали мулоқот чоғида Жазони ўташ федерал хизмати ходимига ундан тортиб олинган видеорегистраторни отгани айтилган. Баратовнинг ўзи айблов ёлғон эканини айтмоқда.
“Мен Улуғ Ватан уруши ғалабасининг 80 йиллигига бағишланган амнистия асосида қамоқдан чиқишга умид қилаётгандим, бироқ бу умидимни ўта муҳим ишлар бўйича терговчи ташрифи чилпарчин қилди, у бугун менга қарши янги жиноят иши қўзғатилгани ҳақидаги қарорни тақдим қилди”, деб ёзган Баратов. Хатга 11 март санаси қўйилган.
Баратов колонияга этап қилинганидан кейин карантинда ушлашгани, кейин 42 кун мобайнида жазо изоляторида тутиб туришгани, 3 мартдан бошлаб эса уни камера туридаги хонага йўллашган — бу қамоқдаги энг кескин жазо шарти бўлиб ҳисобланади. Жазо изоляторига у колонияда ҳаракатланиш чоғида қўлларини орқага қилиб юрмагани учун тушган. Аввалроқ Баратов у ишни ҳибсга олиш чоғида олинган жароҳатлар ва хасталиги туфайли қила олмаётганини айтган эди.
Ўтган йилнинг август ойида Москва вилоятининг Ступино шаҳар суди Усмон Баратовни Россия Федерацияси Жиноят кодексининг 282-моддаси 2-қисми бўйича айбдор деб топиб, жазони умумий тартибли колонияда ўташ шарти билан 4 йилга озодликдан маҳрум қилганди.
Баратовга қарши жиноят иши очилишига унинг “Одноклассники” ижтимоий тармоғига товуқлар акс этган сурат карикатура жойлагани сабаб бўлган. Мазкур карикатурада товуқлардан бири “Тухум бўлиши учун хўрозларни урушдан қайтаринглар” деяётганини кўриш мумкин.