Россиядаги мустақил нашрлар журналистлари ва жамоат арбоблари 4 апрель куни The Wall Street Journal нашрининг Россияда ҳибсга олинган мухбири Эван Гершковични озод қилиш чақириғи билан очиқ хат ёйинлашди.
Хатда муаллифлар Россия Федерал хавфсизлик хизмати (ФСБ) томонидан Гершковичга қарши қўйилаётган жосуслик айбловини асоссиз деб билишлари ва бунга ишонмасликларини қайд этишган.
“ФСБ Гершкович гўё АҚШ топшириғига кўра ҳаракатланган ва Россия ҳарбий-саноат мажмуаси корхоналаридан бири фаолияти ҳақидаги давлат сири бўлган маълумотларни йиғиш билан шуғулланган, дея иддао қиляпти. Бироқ бу баёнотнинг ҳеч қанақа исботи йўқ – бизга давлат хавфсизлиги терговининг сўзларигагина ишониш таклиф этилмоқда”, дейилган хатда.
Хат муаллифлари аввалроқ давлатга хиёнат айблови билан судланган журналист Иван Сафронов ишини эслатишиб, унинг журналистик фаолият учун судлангани, ҳеч қандай жиноят содир этмаганини даъво қилишган. Уларга кўра, янги “жосуслик” иши ҳолатларининг Сафронов иши билан ўхшашлиги Эван Гершковичга билдирилган айблов нақадар ўринли экани юзасидан шубҳалар уйғотмоқда. Журналистлар “Россияда ишлашда давом этиш билан ўзларини хатарга қўяётган” хорижлик мухбирларга ҳам қўллов билдиришган.
Россиянинг Екатеринбург шаҳрида 30 март куни америкалик журналист Эван Гершкович ҳибсга олингани ҳақида Озодлик аввалроқ хабар қилган. Ўша куннинг ўзида Москвадаги суд уни жосуслик айблови бўйича 2 ойга тергов ҳибсхонасига йўллаган. Бу америкалик журналистнинг Россияда (ўша пайтда СССРда) ҳибсга олиниши билан боғлиқ 1986 йилдаги ҳодисадан бери кузатилган илк ҳолатдир.
Россиялик терговчилар иддаосича, Гершкович Қўшма Штатлар буюртмаси бўйича ҳарбий-саноат мажмуаси корхоналаридан бири ҳақида махфий маълумотларни йиғиб юрган. Айбловга оид бошқа тафсилотлар келтирилаётгани йўқ. Гершковичнинг ўзи бу борада изоҳ бериш имкониятига эга бўлган эмас. The Wall Street Journal нашри ва АҚШ расмийлари Гершковичга қўйилган айбловларни қатъиян рад этишиб, журналистнинг айбсизлигини айтишмоқда. АҚШдаги қатор етакчи ОАВ унинг ҳимояси учун чиқишган, Давлат котиби Энтони Блинкен эса Гершковичнинг ҳибсга олиниши муносабати билан Россия ТИВ раҳбари Сергей Лавровга қўнғироқ қилган – Вашингтон билан Москва ўртасида бу каби қўнғироқлар Россия қўшинлари Украинага бостириб кирганидан кейин жуда камайиб кетган.
Гершкович ҳибсга олиниши ортидан АҚШ журналистлар дохил ўз фуқароларининг ҳаммасини хавфсизлик мақсадида Россияни тарк этишга чақирган.