Санкт-Петербург суди Украина уруши воқеаларини ёритиб борган блогер Владлен Татарский (асл исми Максим Фомин) ўлимига оид иш бўйича 25 январь куни Дарья Треповага 27 йиллик қамоқ ҳукми чиқарди.
Озодликнинг “Север.Реалии” лойиҳаси мухбири хабарига кўра, Трепова Россия Жиноят кодексининг учта моддаси - бир гуруҳ шахс томонидан ўлимга олиб борувчи террор хуружини амалга оширганлик, портловчи моддалар ноқонуний айланмаси ва ҳужжатларни сохталаштириш бўйича айбдор деб топилган. Прокурор суддан Треповага 28 йилга озодликдан маҳрум қилиш шаклида жазо сўраган эди.
Татарский ўлимига сабаб бўлган портлаш ўтган йилнинг 2 апрелида Санкт-Петербургдаги кафелардан бирида содир бўлган эди. Портлаш натижасида ўнлаб одам тан жароҳати олган. Жабрланувчиларнинг кўпчилиги Трепова устидан судга ариза билан мурожаат қилишган, улар талаб қилаётган товон пули суммаси 50 миллион рублдан ошади.
Ёши 26 да бўлган Дарья Трепова портлаш кунининг эртасига қўлга олинган ва ўшандан буён тергов ҳибсхонасида тутиб турилибди. Портлашдан бироз аввал у Татарскийга ҳайкалча тақдим этган бўлиб, тергов иддаосича, мазкур совға ичига портлаш мосламаси ўрнатилган бўлган.
Тергов тахминига кўра, Трепова Украина ҳудудидан бошқарилган жиноий гуруҳ таркибига кирган. Россия Федерал хавфсизлик хизмати (ФСБ) аввалроқ Украина фуқароси бўлган Юрий Денисовни портлаш ташкилотчиларидан бири, дея тақдим этган. Иддаога кўра, портлашни ташкил этишда асосий ролни Украинада яшовчи журналист - фаолияти Россияда тақиқланган Миллий-большевистик партиянинг Москва бўлими собиқ лидери Роман Попков ўйнаган. Тергов даъвосига кўра, Трепованинг криптоҳамёнига Попковдан 190 минг рублга яқин маблағ келиб тушган.
Трепова иддаосича, у Попков билан келишувга кўра Татарский билан танишиб, унинг ишончига кириш учун бошқа бир исм билан блогер билан учрашиб юрган. Треповага кўра, ҳайкалчани топшириш топшириқнинг бир қисми бўлган, бу ишни бажарганлик учун унга Украинада журналист бўлиб ишлаш ваъда қилинган эди. Судланувчи ҳайкалчанинг ичида портлаш мосламаси борлигини билмаганини айтган.
Трепованинг эри Попковга мурожаат қилиб, қандай қилиб у ва одамлари рафиқасини алдаб, Татарский билан учрашувга бомбали ҳайкалчани олиб боришга кўндирганини сўзлаб беришни сўраган. Попков блогернинг ўлимига алоқадорлигини тан олмаган, бироқ буни инкор ҳам қилган эмас.
Трепова суднинг илк куниданоқ террор хуружи ва портлаш моддалари ноқонуний айланмасига оид айбловни тан олмаслигини билдирган. Айбланувчи Россияда экстремистлар ва террорчилар рўйхатига киритилган