Ижтимоий тармоқларда тарқалган “Ҳаж ва Умра зиёратига борувчилар менингитга қарши вакцина олишига доир талаб бекор қилинди” деган мазмундаги хабар ҳақиқатдан йироқ, дея маълум қилди Ўзбекистон Санитария-эпидемиологик осойишталик ва жамоат саломатлиги қўмитаси.
Саудия Арабистони cоғлиқни сақлаш вазирлиги 2025 йил февраль ойидан эътиборан Умра ва Ҳаж амалларини бажариш учун подшоҳликка келадиган зиёратчилардан менингитга қарши эмланганлик ҳужжати талаб этилишини билдирганди.
Виза туридан қатъи назар, Саудия Арабистони ҳудудига келаётган барча хорижликлар эмлаш сертификатига эга бўлиши лозим. Бир ёшгача бўлган болалар бундан мустасно.
Сўнгги ҳафталарда ижтимоий тармоқларнинг ўзбек сегментида Саудия томони менингитга қарши эмланиш талабини бекор қилгани ҳақида хабар тарқалганди.
“Мамлакатимизга юқумли касалликларни четдан кириб келишининг олдини олиш ва эпидемиологик барқарорликни сақлаб қолиш мақсадида зиёратчиларни менингитга қарши эмлаш тавсия этилади”, дейилган Санэпидқўмита хабарномасида.
Менингококк инфекцияси – ўткир юқумли касаллик бўлиб, уни бактериялар келтириб чиқаради. Бу касалликнинг назофарингит (бурун ва халқум шиллиқ пардаларининг шамоллаши), менингит (мия қобиқларининг шамоллаши), менингококк сепсиси (қоннинг заҳарланиши) каби кўринишлари мавжуд.
Озодлик аввал хабар қилганидек, Ўзбекистонда 2024 йил охирида Умра лицензияси талаблари кучайтирилди. Умра тадбирларини ноқонуний ташкил этишда айбланган туроператорлар аллақачон жавобгарликка тортилмоқда.