Жанубий Корея пойтахти Сеул шаҳрида Хеллоуин байрамини нишонлаш чоғида рўй берган тиқилинч оқибатида нобуд бўлган 25 ёшли талаба йигитнинг жасади 1 ноябрь куни Ўзбекистонга жўнатилиши кутилмоқда. Бу ҳақда Озодликка Ўзбекистоннинг Корея Республикасидаги элчихонаси вакиллари маълум қилишди.
Қайд этилишича, Сеулдаги фожиа қурбонига айланган М. Н. фарғоналик бўлиб, у Инчон университетининг 4-босқичида таҳсил олиб келган.
Озодлик билан суҳбатлашган ўзбек дипломатлари фуқаро жасадини Ўзбекистонга йўллаш масаласи ҳукумат даражасида назоратга олингани, марҳумнинг оиласи билан доимий алоқа қилиб турилганини қўшимча қилишган.
Ўтган шанба куни Сеулда юз берган тиқилинчда камида 154 киши нобуд бўлган, 130 дан зиёд одам тан жароҳати олган. Озодлик қурбонлардан 26 нафари хорижлик экани, улардан бири ўзбекистонлик бўлгани ҳақида аввалроқ хабар қилган.
Фожиа ортидан Жанубий Корея президенти Юн Сок Ёл мамлакатда бир ҳафталик мотам эълон қилган.