Жорий йилнинг 7 мартидан Швеция расман НАТОнинг 32-аъзо давлатига айланди.
Тегишли ҳужжатларни топшириш маросими Вашингтонда Швеция бош вазири Ульф Кристерссон ва АҚШ Давлат котиби Энтони Блинкен иштирокида бўлиб ўтди.
Маросимда сўз олган бош вазир Кристерссон “хавфсизлик соҳасида Швеция учун янги тарихий давр” бошланганини билдириб, ўз мамлакати иттифоқчилар билан биргаликда ташкилотдаги юк, масъулият ва хатарларни ўртоқлашишини урғулади.
Ўз навбатида, Энтони Блинкен НАТОга аъзо бўлиш Швеция учун ҳам, альянс учун ҳам, трансатлантик алоқалар учун ҳам тарихий ҳодиса эканини қайд этди. Ўз сўзида Блинкен Украинага ҳужум қилиш Россия учун “стратегик фиаско” бўлганини эслатиб ўтди.
Украина президенти Владимир Зеленский Швециянинг НАТОга қўшилишини олқишларкан, бу мамлакатни “ишониш мумкин бўлган кучли иттифоқчи” деб атади. Зеленский Швеция ҳам Украинанинг НАТОга киргани билан қутлайдиган кунлар келишига умид билдирди.
Швеция Финляндия билан биргаликда Россия қўшинлари Украинага бостириб кирганидан кўп ўтмай - 2022 йилнинг баҳорида НАТОга аъзо бўлиш учун ариза берган эди. Бунгача мамлакат 200 йил давомида ҳарбий блокларга қўшилмай, бетараф қолиб келаётган эди.
Финляндия НАТОга ўтган йили аъзо бўлган. Швециянинг аъзолик масаласи эса Туркия ва Венгрия позицияси ортидан бироз ортга сурилган.
Туркия шу йилнинг январида Швециянинг НАТОга қўшилишига розилик берган. Бош вазир Кристерссон 23 февраль куни Будапештга ташриф буюриб, қатор келишувларга эришиши ортидан Венгрия ҳам Швецияинг НАТОга аъзо бўлишини маъқуллаган эди.