Sirdaryoda Captiva avtomobili bilan odamlarni qasddan urib yuborish maqsadida quvib yurgan haydovchi hibsga olingan. Bu haqda Sirdaryo viloyati Ichki ishlar boshqarmasi matbuot xizmati ma’lum qildi.
Avvalroq ijtimoiy tarmoqlarda Captiva rusumli avtomashina haydovchisi futbol maydonida odamlarni bosib ketish maqsadida ularning orqasidan quvib yurgani aks etgan video tarqalgan edi.
Qayd etilishicha, mazkur holat Sirdaryo viloyati IIB mas’ul xodimlari tomonidan o‘rganilgan hamda videodagi “avtomashina haydovchisiga nisbatan O‘zbekiston Respublikasi Jinoyat kodeksining 277-moddasi bilan jinoyat ishi qo‘zg‘atilib, tegishli tartibda qamoqqa olingan”.
Sirdaryo IIB xabarnomasida avtomashina jarima maydonchasiga joylashtirilgani, videodagi holat yuzasidan surishtiruv harakatlari olib borilayotgani qo‘shimcha qilingan.