Италияда бош вазир Мелонига қарши тергов бошланди

Жоржа Мелони

Жоржа Мелони

Рим прокуратураси Ҳаагадаги Халқаро жиноят суди (ХЖС) томонидан қидирилаётган ливиялик дала қўмондонининг бадарға қилинишига оид иш бўйича Италия бош вазири Жоржа Мелони ва икки вазирга қарши тергов бошлади. Euronews хабарига кўра, тергов бошланганини Мелонининг ўзи эълон қилган.

Италия бош вазири Усома ал-Масрий номи билан танилган Усома Анжиемага ёрдам кўрсатганликда айбланмоқда.

Мелонига кўра, тергов адлия вазири Карло Нордио ва ички ишлар вазири Маттео Пьянтедозига ҳам қарши олиб борилмоқда.

Айблов юзасидан изоҳ бераркан, Мелони: “Кеча тўғри бўлган нарса бугун ҳам тўғри бўлиб қолмоқда. Мени шантаж қилиб ва қўрқитиб бўлмайди”, дея билдирган.

Жоржа Мелони ҳукумати ал-Масрий Халқаро жиноят суди ордерига кўра Туринда ҳибсга олинганидан кейин озод қилиб юборилганидан кейин мухолифат, инсон ҳуқуқлари ташкилотлари ҳамда ХЖС томонидан танқидга учраган.