TikTok platformasini boshqaruvchi ByteDance shirkati asoschisi Chjan Imin Xitoyning eng badavlat odamiga aylandi. Hurun China Rich List tomonidan har yili yoyinlanuvchi ro‘yxatga muvofiq, tadbirkorning shaxsiy boyligi 49,3 milliard dollarni tashkil etadi. Bu haqda Reuters agentligi xabar qildi.
Chjan Imin 2021-yilda ByteDance bosh direktori lavozimidan ketgan va 26 yil ichida 18-bo‘lib Xitoyning eng boy odami nomiga ega bo‘lgan. Nurun China Rich List nashri aynan shuncha yildan buyon boy odamlar ro‘yxatini e’lon qilib keladi.
TikTok sohibi shishaga suv va boshqa alkogolsiz ichimliklar quyib sotadigan Nongfu Spring shirkati egasi Chjun Shanshanni ham ortda qoldirgan. Shanshanning sarvati o‘tgan bir yil ichida chorak qismga qisqargan va endilikda 47,9 milliard dollarni tashkil qilmoqda.
AQSHda aktivlari ustidan sud jarayoniga ketayotganiga qaramay, ByteDance shirkatining global daromadi 2023-yilda 30 foizga oshgan.
Xitoydagi boylarning bu galgi ro‘yxatida milliarderlar soni 142 nafarga kamayib, endilikda 753 nafarni tashkil etmoqda. 2021-yilda bu mamlakatda milliarderlar soni bundan 36 foizga ko‘p (1185 nafar) edi.