Токиодаги Ханэда аэропортининг учиш-қўниш йўлагида 2 январь куни Japan Airlines авиаширкатига тегишли йўловчи учоғи ёниб кетган. Учоқ бортида 400 яқин йўловчи ва экипаж аъзолари бўлган. Япониянинг NHK телеканали хабарига кўра, учоқдагиларнинг барчаси эвакуация қилинган.
Телеканал қайдича, Токиодан Хоккайдога парвоз қилаётган учоқ ҳавога кўтарилган пайтда Соҳил қўриқчилиги учоғи билан тўқнашиб кетган. Соҳил қўриқчилиги учоғида олти киши бўлган. Улардан бири учоқдан чиқишга муваффақ бўлган, қолган беш кишининг тақдири ҳозирча маълум эмас.
Соҳил қўриқчилиги экипажи зилзиладан жабр кўрган ҳудудларга учиб кетишга ҳозирланаётган бўлган. 1 январь куни Японияда 150 дан зиёд ер силкиниши кузатилган. Зилзилалардан энг кучлиси 7,6 магнитудали бўлган. Бунинг натижасида, сўнгги маълумотларга кўра, элликка яқин одам қурбон бўлган, яна шунча киши тан жароҳати олган.
Зилзилалар ортидан Япониянинг ғарбий соҳили бўйлаб цунами хавфи эълон қилинган эди, орадан бир кун ўтиб бу хатар кечгани айтилган.