Толибон ҳукумати Афғонистондаги барча телеканалларга аёл актёрлар иштирок этган телесериалларни намойиш этишни тақиқлади. Бундан ташқари телеканалларнинг аёл бошловчилари бундан буён экранда фақат ҳижоб кийган ҳолда кўриниш беришлари шарт.
Толибон ҳукумати “ислом шариатига мақбул бўлган 8 қоида”дан иборат ҳужжатни 21 ноябрь куни эълон қилди.
Мазкур ҳужжатга асосан телеканалларда “ислом ҳуқуқига” ва афғонлар маънавиятига тўғри келмайдиган, аҳолининг муайян қатламлари томонидан “ҳақорат ва таҳқир” сифатида қабул қилиниши мумкин бўлган кўрсатувларни эфирга узатиш ҳам тақиқланди.
Бундан ташқари Муҳаммад пайғамбар сиймоси акс эттирилган фильмларни намойиш этиш, исломий стандартларга жавоб бермайдиган кийимларни кийган эркакларни кўрсатиш ҳам мумкин эмас.
Толибон ҳукумати мазкур қарор “сўз эркинлигини бўғиш” сифатида талқин қилинмаслиги кераклигини, бу “шунчаки амал қилиш лозим бўлган қоида” эканлигини таъкидлади.