Qozog‘iston prezidenti Qasim-Jomart Toqayev O‘zbekiston prezidentining yordamchisi Saida Mirziyoyevani qabul qildi, deya ma’lum qildi Oqo‘rda matbuot xizmati.
Xabarnomada qabul chog‘ida ikki mamlakatlar o‘rtasidagi ko‘ptomonlama hamkorlikni yanada olg‘a siljitishning dolzarb masalalarini muhokama qilingan.
“Qozog‘iston va O‘zbekiston hamkorligining ittifoqchilik va strategik xarakterini qayd etarkan, Qasim-Jomart Toqayev yuqori darajadagi siyosiy muloqotni samarali ravishda kengaytirish uchun prezidentlar ma’muriyatlari o‘rtasidagi tig‘iz aloqalar o‘rnatishning muhimligini urg‘uladi. Axborot-mafkuraviy, madaniy-gumanitar va ta’lim sohalarida, shuningdek, yoshlar siyosati sohasida o‘zaro manfaatli hamkorlikni chuqurlashtirishga ham alohida e’tibor qaratildi”, deyilgan Oqo‘rda xabarnomasida.
Qozog‘iston prezidenti “Zakovat” xalqaro intellektual o‘yinlarining Ostonada o‘tkazilishini olqishlab, bu kabi tadbirlar xalqlarning madaniy jihatdan yaqinlashuvida muhim rol o‘ynashini qayd etdi.
Qasim-Jomart Toqayevning Saida Mirziyoyeva bilan uchrashuvi O‘zbekiston prezident Shavkat Mirziyoyevning 7-8-avgust kunlariga belgilangan Ostona safari arafasida bo‘lib o‘tdi. Bu kunlarda Ostonada Toshkent madaniyati kunlari ham o‘tkaziladi.
O‘zbekiston prezidenti Shavkat Mirziyoyev katta qizi Saida Mirziyoyevani o‘tgan yilning avgust oyida prezident yordamchisi lavozimiga tayinlagan edi.