Тошкент ҳаво ифлосланиши бўйича яна аксилрекорд қайд этди

Тошкентда кузатилган чанг бўронидан лавҳа (архив сурати)

Тошкентда кузатилган чанг бўронидан лавҳа (архив сурати)

Тошкент шаҳри жорий йилнинг 28 январь куни ҳаво ифлосланиши даражаси бўйича дунёдаги йирик шаҳарлар орасида яна биринчи ўринга чиқди.

Маҳаллий нашрларнинг IQAir портали таҳлилларига таянган ҳолда хабар қилишларича, cоат 14:23 ҳолатига кўра, Тошкент ҳавосида майда PM2,5 дисперс зарраларининг концентрацияси 206 мкг/м³ ни ташкил этган. Бу ЖССТ томонидан тавсия этилган ўртача ҳаво сифати кўрсаткичидан 41,2 бараварга кўп.

Бундай об-ҳаво шароитида аҳолидан зарурат бўлмаса кўчага чиқмаслик, сурункали нафас олиш йўллари касалликларига чалинган фуқаролар тиббий ниқоблардан фойдаланиши тавсия қилинади.

IQAir кўрсаткичи 100 дан юқори бўлса, саломатлик учун зарарли, 200 дан юқори бўлса, жуда зарарли деб баҳоланади.

Ўзбекистон пойтахтида ҳаво ифлосланиши даражаси бўйича аксилрекорд бир йил аввал ҳам қайд этилганди.

IQAir порталига кўра, 2024 йилнинг 21 февраль куни Тошкент ҳавосида PM2,5 дисперс зарраларининг концентрацияси 171 мкг/м3 ни ташкил этган. Жаҳон банки ҳисоботига мувофиқ, Тошкентда PM2,5 майда заррали чанглар таъсири оқибатида йилига ўртача 3042 киши бевақт вафот этади.

Аввалроқ Ўзбекистон Экологик партияси Бош прокуратурадан Тошкентда атмосфера ҳавоси ифлосланиши юзасидан тезкор чора кўришни сўраганди. БП ушбу сўровга жавобан қандай чора кўргани маълум эмас.