Жанубий Каролина штатининг собиқ губернатори ва АҚШнинг БМТдаги элчиси Никки Хейли расман кейинги йилнинг ноябрида ўтадиган президентлик сайловига ўз номзодини кўрсатишини билдирди.
Хейлининг сайлов олдидаги биринчи учрашуви Жанубий Каролинадаги Чарльстон шаҳрида ўтказилди. У ўз нутқида Америка ҳокимиятига сиёсатчиларнинг янги авлоди келиши лозимлигини урғулади.
51 ёшли Хейли Республикачилар партиясидан президентликка номзодини кўрсатган иккинчи сиёсатчи бўлди. Ундан олдин партия номидан собиқ президент Дональд Трамп ҳам ўз номзодини кўрсатган эди. Трамп сайловолди кампаниясини ўтган йилнинг кузида бошлаб юборган.
Аввалроқ Хейли Трампга рақобатчи бўлмаслигини билдирган эди, кейинроқ у ўз фикрини ўзгартирган. Трамп президлентлиги даврида Хейли АҚШнинг БМТдаги элчиси бўлган ва у билан яхши муносабатларни сақлаб қолган эди.
Дастлабки сўровлар натижаларига қараганда, Хейли ҳозирча республикачиларнинг 4 фоизи, Трамп эса 43 фоизи қўлловига эга бўлмоқда. Республикачиларнинг 31 фоизи эса Флорида губернатори Рона Десантисни қўлламоқчи. Бироқ у ҳозирча президентлик сайловида иштирок этишини эълон қилмади.
АҚШнинг амалдаги президенти, демократ Жо Байден расман ўз номзодини президентликка кўрсатгани йўқ. Оқ Уй расмийлари Байден 2024 йилдаги сайловда иштирок этиш ниятида эканини бир неча бор билдирган. Байден 2024 йилда 81 ёшга, Трамп 77 ёшга тўлади.