Туркияда 6 февраль куни рўй берган кучли ер силкинишлари оқибатида нобуд бўлганлар сони, 9 февраль маҳаллий вақт билан соат 07:45 ҳолатига, 12 минг 873 кишига етган. Бу ҳақда Anadolu агентлиги Туркия Фавқулодда вазиятлар бошқармасидан (AFAD) олинган маълумотга таянган ҳолда хабар қилди. Сўнгги маълумотларга кўра, зилзила чоғида жароҳат олганлар сони 62 минг 914 нафарга етган.
Туркияга қўшни бўлган Сурияда эса зилзила туфайли вафот этганлар сони камида 2 минг 950 нафарга чиққан. Бу ҳақда Reuters агентлиги президент Башар Асадга содиқ кучлар ҳамда Суриянинг бир қисмини назорат қилаётган исёнчилар вакилларидан олинган маълумот асосида хабар қилди. Сурия давлат ОАВлари фожиа натижасида 298 мингдан зиёд киши бошпанасиз қолганини ёзмоқда.
ЖССТ маълумотига кўра, Туркия ва Сурияда зилзила сабабли 1,4 миллион бола дохил 23 миллион нафар киши жабр кўрган бўлиши мумкин.
Туркияда вайронгарчиликларга сабаб бўлган илк ер силкиниши 6 февраль тонгига яқин рўй берган. Зилзила эпимаркази Қаҳрамонмараш вилоятининг Пазаржик туманида (7,8 балл) – Газиантеп шаҳридан 30 километр, Сурия билан чегарадан эса 90 километр нарида бўлган.
AFAD маълумотига кўра, биринчи зилзиладан кейин умумий ҳисобда 435 марта ер силкинган, улар орасида энг кучлиси Элбистон туманида (7,6 балл) 6 февраль куни туш пайтида юз берган.
Ер силкиниши ортидан Туркияда олти мингга яқин бино вайрон бўлган. Мамлакат президенти Ражаб Тоййиб Эрдўғон бу галги ер силкинишлари 1939 йилги Эрзинжон зилзиласидан кейин рўй берган энг йирик фалокат бўлганини эътироф этган. Ҳодиса ортидан Туркияда 12 февралгача миллий мотам эълон қилинган. Зилзила таъсири сезилган 10 та вилоятда уч ойга фавқулодда вазият тартиби жорий этилган. Расмийлар зилзила оқибатини бартараф этиш учун 100 миллиард лира (тақрибан 5,3 миллиард доллар) маблағ ажратишган.
Зилзила ҳудудидаги қидирув-қутқарув амалиётларига 110 мингдан зиёд одам жалб этилган. Бу амалиётларда Ўзбекистон ФВВ йўллаган ходимлар дохил 5 мингдан зиёд хорижлик қутқарувчи ҳам иштирок этишмоқда.