Туркманистон Ўзбекистондан келаётган юк машиналари учун Каспийдаги халқаро денгиз портига йўл очиб беради. Бу ҳақда, “Нейтральний Туркменистан” газетаси хабарига кўра, мамлакат президенти Сердар Бердимуҳамедовнинг 2 май куни Ашхободда очилган Халқаро транспорт форуми иштирокчиларига мурожаатномасида айтилган.
“Мамлакатимизнинг шарқий ҳудудини марказ билан бирлаштирувчи юқори тезликли автойўлнинг “Ашхобод-Туркманбоши” автобанига бириктирилиши қўшни Ўзбекистондан келаётган юк автомобилларининг Каспийдаги Халқаро денгиз портига чиқишини, у ердан эса Кавказга, Европага, Россия жанубига ҳамда Эрон шимолига, денгиз йўли орқали Форс ва Оман кўрфазларига чиқишини таъминлайди”, деган Туркманистон президенти.
Ўтган йил ноябрида Ўзбекистон хорижий ўлкаларга экспортни кўпайтириш учун Латвиянинг Вентспилс портидан фойдаланишни режалаётгани ҳақида хабар қилинган.
Ўзбекистоннинг бу мақсадда хорижга чиқиш учун Россия ва Эрондан бошқа муқобил йўллар излаётгани ҳам сир эмас. Хусусан, 2021 йил июль ойида Ўзбекистон ва Покистон ўртасида транзит савдоси бўйича имзоланган битим ҳам бу йўлда қўйилган қадамлардан бири ўлароқ баҳоланган эди.