Ўзбекистон Марказий банкининг валюта операцияларини амалга ошириш қоидаларини ўзгартиришга оид қарори тадбиркорлар томонидан танқид қилинмоқда, деб ёзди Spot.
Марказий банк бу борадаги идоралараро қарор лойиҳасини 4 ноябрда муҳокамага қўйганди. Тадбиркорлар фикрича, қарор кучга кирган тақдирда тадбиркорлик субъектлари томонидан чет эл валютасини харид қилиш устидан назорат кучайтирилади.
“Тошкент” республика фонд биржаси бошқаруви раиси Георгий Паресишвили мазкур қарорни шарҳлар экан: “Қарор қабул қилинадиган бўлса, валюта сотиб олиш ва уни хорижга олиб чиқиш жуда қийинлашади, бу жараён ҳозир ҳам енгил эмас. Бу бизнинг фонд бозоримизга кирмоқчи бўлган жиддий инвесторлар учун эшикларни ёпади. Чунки валюта сотиб олиш ва хорижга олиб чиқишда ундан кўплаб жуда мураккаб ҳужжатлар талаб қилинади”,- деб айтди.
Молиявий таҳлилчи Карен Срапионов эса Марказий банк томонидан амалга оширилиши кутилаётган чекловлар валютага бўлган талабни оширишини таъкидлади. Унга кўра, бу ҳолатда инвесторлар Ўзбекистонга сармоя киритишдан тийиладилар.
Portfolio Investments ширкати бош директори Мунир Якубов ҳам МБ жорий этмоқчи бўлган янги қоидалар инвесторларни Ўзбекистон бозоридан бездиришини қайд этган.
Марказий банк тадбиркорларнинг бу баёнотларига муносабат билдирар экан, конвертация қоидаларига киритилаётган ўзгартиришлар “валюта операцияларини чеклашни эмас, амалдаги нормаларни аниқлаштириш ва операцияларни амалга ошириш жараёнини соддалаштириш”га қаратилганини таъкидламоқда.
Марказий банк таклиф қилаётган янги тартибга асосан хорижий инвесторларнинг фойдалари, дивидендлари ва бошқа даромадлари репатриация қилинганда — фойда тақсимоти, дивидендлар тўланганлиги тўғрисидаги ҳужжат, аудиторлик ташкилоти ёки солиқ органининг хулосаси, шунингдек солиқ органининг даромад солиғи тўлангани тўғрисидаги тасдиқномаси талаб қилинади.
Бундан ташқари банк миллий валютадаги маблағларнинг келиб чиқиши қонунийлигини тасдиқловчи ҳужжатларни ҳам талаб қилиши мумкин.