Қишлоқ хўжалиги вазирлиги Россия шакар экспортига шу йил 31 августигача тақиқ жорий этгани ортидан Ўзбекистонда шакар нархи ошиб кетиши ҳақида ижтимоий тармоқларда тарқаётган хабарга муносабат билдирди.
Вазирлик қайдича, Ўзбекистонда шакарга бўлган йиллик талаб ўртача 650-700 минг тоннани ташкил этади, Ангрен ва Хоразмдаги шакар заводлари эса йилига 900 минг тоннадан кўпроқ (мамлакат ички эҳтиёжидан камида 200 тонна кўп) шакар ишлаб чиқаради.
Хабарномада Россиянинг шакар экспортига тақиқ қўйиши Ўзбекистоннинг ички бозорида танқисликни келтириб чиқармаслиги, чунки Ангрен ва Хоразм шакар заводлари хом ашёни Россиядан эмас, бошқа мамлакатлардан олаётгани урғуланган. Хусусан, вазирлик 2023 йилда Ўзбекистондаги шакар заводлари 762 минг тонна хом ашёни (шакар чиқиши 98 фоиз) Бразилия ва Ҳиндистондан импорт қилишганига эътибор қаратган.
Қишлоқ хўжалиги вазирлиги шу кунда Ангрен ва Хоразм шакар заводлари биржага ички бозор учун ҳар куни 2 100 тонна маҳсулот чиқараётгани ва бу маҳсулотнинг ўртача 300 тоннасигина сотилаётганини қўшимча қилган.