Хитой Илон Маскнинг Space X ширкатини сунъий йўлдошлари билан ерга яқин орбитадаги ўз космик станцияси хавфсизлиги учун хатар туғдирганликда айблади.
БМТ бош котибига йўлланган нотада Хитой ўз космик станцияси шу йилнинг июль ва октябрь ойларида тартибсиз ҳаракатланаётган Starlink спутниклари билан тўқнашиб кетишдан қочиб, икки марта манёвр қилишига тўғри келганини маълум қилган.
Пекин ўз нотасида, 1967 йили имзоланган коинот тўғрисидаги шартномага мувофиқ, давлатлар ўз ҳудудида жойлашган давлатга тегишли ёки хусусий ширкатларнинг коинотдаги хатти-ҳаракатлари учун жавобгар эканини эслатган.
Ҳозирда орбитада Starlink ширкатига қарашли 1800 чоғли спутник учиб юрган бўлиб, улар қарийб йигирмата мамлакатни юқори тезликдаги интернет билан таъминлашга кўмаклашмоқда. Ширкат АҚШ расмийларидан космосга 12 мингта сунъий йўлдош учириш учун рухсатнома олган. Илон Маскка кўра, сайёранинг исталган нуқтасидан интернетга чиқиш имконини яратиш бўйича режани амалга ошириш учун SpaceX ширкатига 30 мингга яқин спутник лозим бўлади.
SpaceX ширкати Хитойнинг сунъий йўлдошларга оид эътирози юзасидан ҳали изоҳ берганича йўқ.