ХХР Ташқи ишлар вазирлиги ва Хитойнинг Украинадаги элчихонаси ўз фуқароларини “Украинадаги хавфсизлик билан боғлиқ вазият таранглашгани”ни эътиборга олган ҳолда хавфсизлик чораларини кучайтириш ва мамлакатдан чиқиб кетишга чақирди. Элчихона эвакуацияни ташкил этишда ўз ёрдамини таклиф қилган. Бу ҳақда Хитойнинг инглиз тилида чиқадиган Global Times расмий нашри хабар қилди.
Айни пайтда Мисрнинг Киевдаги элчихонаси ҳам “имкон қадар тезроқ” Украинани тарк этишга чақирган. Бу ҳақда Egypt Today нашри ёзди. Мисрлик дипломатлар ўз ватандошларига қуруқликдаги йўналишлардан фойдаланган ҳолда қўшни мамлакатларга ўтиб кетишни тавсия қилишган. Шунингдек, элчихона мисрликларни максимал даражада эҳтиёткор бўлиш ва “хавфли ҳудудлар”дан нари юришга чақирган.
Ўтган ҳафтада Ўзбекистоннинг Киевдаги элчихонаси ҳам Украинадаги ватандошлардан мамлакатни тарк этишни сўраган эди.