Сирдарё вилояти Гулистон шаҳри ҳокимининг собиқ ўринбосари Қодир Додоев жуда кўп миқдорда фирибгарлик жиноятини содир қилганликда айбдор деб топилди ва 2 йил мансабдорлик, моддий жавобгарлик лавозимларида ишлаш ҳуқуқидан маҳрум қилингани ҳолда 9 йил муддатга қамалди.
Kun.uz нашрининг суд ҳужжатига таянган ҳолда ёзишича, Гулистон шаҳри ҳокимининг ўринбосари – инвестиция ва ташқи савдо бўлими бошлиғи лавозимида ишлаган Қодир Додоев 2023 йил сентябр ойида тадбиркорлик фаолиятини йўлга қўйиш ҳамда инвестиция киритиш мақсадида Сирдарё вилоятига келган Хитой Халқ Республикаси фуқароларининг ишончига кирган.
Мулозим мансабидан фойдаланган ҳолда фирибгарлик йўли билан хитойлик инвестор Жин Донгенгнинг жами 350 минг доллардан ортиқ, Лиу Чангҳиангнинг эса 21 минг доллар пулини ўзлаштирган.
Суд ҳукмига кўра, ушбу жиноятларда ҳоким ўринбосарига кўмак берган таржимон Абдуворис Абдувалиев 9 йилу 7 ой муддатга, фуқаро Шокир Файзиев эса 6 йилу 1 ой муддатга озодликдан маҳрум қилинган.
Бир неча кун аввал маҳаллий матбуот Бухоро вилояти Ромитан тумани ҳокимининг инновацион ривожланиш масалалари бўйича ўринбосари Азиз Бобоев фирибгарлик ҳамда ҳужжатларни қалбакилаштиришга оид жиноят иши доирасида судланаётгани ҳақида хабар қилган эди.