Россия Ички ишлар вазирлиги миграцияга доир қонунчиликни кучайтирадиган қонун лойиҳаси устидан ишини якунлаган. Унда, жумладан хорижликларнинг Россия ҳудудида визасиз юриш муддатини бир йил ичида 90 кунгача қисқартириш ҳамда уларни биометрик маълумотларни топширишга мажбурлаш таклиф қилинмоқда. Бу ҳақда РФ ИИВ вакиласи Ирина Волк маълум қилди.
Россия Ички ишлар вазирлиги хорижликларнинг рақамли профилини яратиш, шунингдек, иш берувчилар ва хорижлик ишчилар реестрини тузишни таклиф қиляпти. Шу билан бирга чет давлат фуқароларига уларнинг шахсини тасдиқловчи ягона ҳужжат бериш режаланмоқда. У бугунги кунда берилаётган барча миграцион ҳужжатлар ўрнини босиши лозим.
Россияга киришда хорижликлар биометрик маълумотларни топширишдан ташқари хайрихоҳлик тўғрисидаги битимни имзолашлари керак бўлади. Битимда улар, агар қонунларни бузадиган бўлсалар, мамлакатга кириш ҳуқуқлари чекланиши ҳақида огоҳлантирилишади. Қонун лойиҳасига мувофиқ, хорижлик фуқароларни Россиядан судлар сингари ижроия ҳокимияти органлари ҳам бадарға қилишлари мумкин бўлган.
Жорий йилнинг 22 мартида Москва вилоятидаги “Крокус Сити Холл” концерт залига ҳужум уюштирилган бўлиб, унинг натижасида 144 киши нобуд бўлган. Терактни амалга оширганликда гумонланиб Тожикистонда туғилган тўрт фуқаро ҳибсга олинган.
Теракт ортидан Россиянинг кўплаб шаҳарларида хавфсизлик чоралари кучайтирилган, хорижликларга қарши рейдлар ва текширувлар ўтказила бошлаган. Шунингдек, бир қатор кремлпараст арбоблар оғзидан миграцион қонунчиликни кучайтириш чақириқлари янграмоқда. ИИВ вакиласи Ирина Волк янги қонун лойиҳасининг ишлаб чиқилиши теракт билан боғлиқ ёки эмаслигини очиқламаган.