Япония уруш оқибатида вайрон бўлган инфратузилмасини тиклаш учун Украинага 5,5 миллиард долларлик ёрдам пакетини ажратади. Бу ҳақда мамлакат бош вазири Фумио Кисида 20 февраль куни Токиода ўтказилган глобал форум чоғида билдирган.
Кисида Украина президенти Владимир Зеленскийни “Катта еттилик”нинг (G7) Россия агрессиясининг бир йиллигига бағишланган онлайн-саммитига таклиф қилган. Associated Press агентлигининг ёзишича, мазкур саммитда G7 мамлакатлари Украинага дастак бўйича бундан буёнги қадамларни эълон қилишади.
Уруш бошидан бери Япония Украинага 600 миллион долларлик молиявий ёрдам пакетини, шунингдек, қиймати бир неча юз миллион долларга тенг бўлган инсонпарварлик ёрдамини тақдим қилган.
Япония АҚШ ва ЕИнинг Украина ҳудудига бостириб кирган Россияга қарши санкциялар жорий қилиш қарорига қўшилган. Мамлакат Россияга вакциналар, тиббий жиҳоз ва роботлар экспорт қилишни тақиқлаган. Бундан ташқари, Япония расмийлари Россия фуқаролари ва ширкатларига қарши санкциялар рўйхатини кенгайтирган.
Аввалроқ 300 га яқин Россия ширкати ва ташкилоти Япония санкциялари остига тушган эди. Япония расмийлари ВТБ, Сбербанк, Внешэкономбанк, "Откритие" банки, Промсвязьбанк ва Альфа-Банк активларини музлатиб қўйган.