Украина президенти Владимир Зеленский мамлакат ҳукумати Россия қўшинлари Херсон вилоятидаги Каховка ГЭСи тўғонини миналаганига доир маълумотларга эгалигини билдирди. Бу ҳақда Зеленский 20 октябрь куни видеоалоқа орқали Еврокенгаш йиғилишида сўзлаган нутқида айтган.
“Бизда мавжуд маълумотга кўра, Россия террорчилари Каховка гидроэлектр станцияси тўғони ва агрегатларини миналаганлар. Бу йирик энергетика иншоотларидан биридир. ГЭС тўғони салкам 18 миллион куб метр сувни тутиб туради. Россия террорчилари уни портлатгудек бўлса, 80 дан зиёд аҳоли маскани, жумладан Херсонни сув босиши мумкин”, дея Зеленскийдан иқтибос келтирган “Интерфакс-Украина”.
Украина президенти портлаш бўлган тақдирда мамлакат жанубида сув таъминоти бузилиши мумкинлигини қўшимча қилган. Қолаверса, бу Европада энг йирик бўлмиш Запорожье атом электр станцияси учун ҳам катта хавф туғдиради, чунки АЭС реакторларини совутиш учун сув айнан Каховка сув омборидан олинади.
Зеленский Каховка ГЭСига халқаро кузатув миссиясини жўнатиш ва у ерга ГЭСнинг украиналик ходимларини қайтариш ташаббуси билан чиққан.
Каховка ГЭСи тўғони Днепр дарёсидан ўтиш жойи ҳамдир. АҚШнинг Урушни ўрганиш институти (ISW) сўнгги ҳисоботларидан бирида Россия қўшинлари Херсондан чекиниш чоғида шаҳарни ва унинг атрофини сув бостириш мақсадида тўғонни портлатиши мумкинлигини тахмин қилган.
Бир неча кун аввал Украинадаги Россия қўшинлар гуруҳи қўмондони, армия генерали Сергей Суровикин Украина ҳарбийлари тўғонни портлатишни режалаётганини иддао қилган. ISW экспертлари буни Россия “ўзга байроқ остида” амалиёт ўтказишга ва муҳтамал фожиа учун жавобгарликни Украинага тўнкашга ҳозирланаётгани белгиси, дея баҳолашмоқда.