Украина президенти Владимир Зеленский 26 декабрь куни кечқурун Россия эвакуация поезди турган Херсон темир йўл вокзалига зарба берганини билдирди.
«Ҳозир барча хизматлар воқеа жойига етиб борди. Ўлганлар ва жабрланганлар сони аниқланмоқда. Бу ерда жуда кўп тинч аҳоли бор эди», – деди Зеленский.
«Украина темир йўллари» ширкати бомбардимон оқибатида Херсон вокзали ва эвакуация поездига зарар етгани ҳақида маълум қилди. Ширкатнинг билдиришича, темир йўлнинг бир неча ходими яраланган.
Украина ички ишлар вазири Игорь Клименко аҳолини эвакуация қилаётган полиция лейтенанти ҳалок бўлганини, икки полициячи ва тинч аҳолидан икки киши яраланганини айтди.
Россия вокзални бомбардимон қилган пайтда у ерда эвакуация қилинаётган 140 киши бўлган.
Херсон вилояти ҳокими Александр Прокудин минтақа кун давомида Россия томонидан бомбардимон қилинганини ва ҳозирча уч кишининг ҳалок бўлгани маълум эканини билдирди.
Россия 2022 йил февралида Украинага уруш бошлаганидан бери тинч аҳолига ва фуқаролик объектларига зарба бераётгани тўғрисидаги хабарларни рад этиб келмоқда.
Зеленский: Россия Херсон вокзалидаги тинч аҳолига ҳужум қилди
Херсон вокзали. Иллюстратив сурат.