Украина Қуролли кучларининг собиқ бош қўмондони Валерий Залужний мамлакат президенти фармони билан Украинанинг Буюк Британиядаги фавқулодда ва мухтор элчиси лавозимига тайинланган. Бу ҳақда 7 март куни Украина Ташқи ишлар вазирлиги маълумот тарқатди. Вазирлик розилик олиш учун Лондонга хат йўлланганини қайд этган.
Аввалроқ президент Владимир Зеленский Украинанинг Лондондаги элчиси лавозимига Залужний номзоди тасдиқлангани ҳақида маълум қилган эди. “Генерал Валерий Залужний менга ўзи учун айнан шундай йўналиш - дипломатик йўналиш ҳақида гапирган эди. Украина Ташқи ишлар вазирлиги тегишли сўровномани йўллади. Бизнинг Британия билан иттифоқчилигимиз бундан буён фақат мустаҳкамланиб бориши лозим”, деб ёзган Зеленский ўз telegram-каналида.
Жорий йилнинг 8 февралида Зеленский Украина Қуролли кучларининг бош қўмондонини алмаштирган. Ўша пайтда истеъфога чиқарилган генерал Залужний ўрнини генерал-полковник Александр Сирский эгаллаган. 9 февраль куни Залужний Украина қаҳрамони унвони билан тақдирланган. Ўшанда унинг қайси лавозимга тайинланиши очиқланган эмас. Айни пайтда Зеленский Залужнийга “ўз командасида қолиш”ни таклиф этганини билдирган.
2023 йил якунида Украина ва жаҳон оммавий ахборот воситаларида мамлакат армиясининг ҳужумлари кутилган натижаларни бермаётгани манзарасида Зеленский билан Залужний ўртасида зиддият юзага келган бўлиши мумкинлиги ҳақида хабарлар пайдо бўлган эди.