АҚШнинг кўп маротаба қўлланиладиган бошқарилувчи Crew Dragon-1 коинот кемаси Халқаро космик станциядан ажралганидан сўнг 6,5 соат давом этган парвозни якунлаб Мексика кўрфазига қўнди.
Кема Ерга NASA астронавтлари Майкл Хопкинс, Виктор Гловер, Шеннон Уокер ва япониялик фазогир Соичи Ногучини олиб тушди.
Ракетани сувдан олиб чиқиш учун Мексика кўрфазига қидирув-қутқарув кемаси ва АҚШ Соҳилни қўриқлаш хизматининг иккита патрул кемаси жўнатилди.
Crew Dragon-1 экипажи Халқаро космик станцияда олти ой ишлади. Бу SpaceX ширкати NASA билан тижорий шартнома асосида ишлаб чиққан ва кўп маротаба қўлланиладиган бошқарилувчи АҚШ ракетасининг энг биринчи мунтазам парвози бўлди.
Айни пайтда Халқаро космик станцияда “Роскосмос” космонавтлари Олег Новицкий ва Петр Дубров, NASA астронавтлари Марк Ванде Хай, Меган Макартур ва Шейн Кимбро, Европа коинот агентлиги фазогири Томас Песке ва япониялик фазогир Акихико Хосидэ ўз фалиятини давом эттирмоқда.