БМТ Бош котиби Антониу Гутерришнинг Ўзбекистонга ташрифи доирасида 1 июль куни Тошкентдаги Кўксарой қароргоҳида унга Ўзбекистоннинг олий давлат мукофотларидан бири — "Олий Даражали Дўстлик" орденини тантанали топшириш маросими бўлиб ўтган.

Президент матбуот хизмати маълумотига кўра, мазкур орден Гутерришга “жаҳонда ҳамжиҳатлик ва бирдамликни фаол илгари суриш, ташкилот фаолияти самарадорлигини ошириш” ҳамда Ўзбекистон билан БМТ ўртасидаги ҳамкорликни мустаҳкамлашдаги хизматлари учун топширилган.

Маросимда БМТ бош котибининг халқаро хавфсизлик ва барқарорликни мустаҳкамлаш, глобал бошқарув институтларини ислоҳ қилиш, Барқарор ривожланиш мақсадларини илгари суриш, иқлим ўзгаришига қарши курашиш, "яшил" ва рақамли тараққиёт, озиқ-овқат ва энергетика хавфсизлигини таъминлаш борасидаги кўп йиллик саъй-ҳаракатлари қайд этилган.

Куннинг биринчи ярмида Антониу Гутерриш Ўзбекистон президенти Шавкат Мирзиёев билан музокаралар олиб борган.

“Музокаралар чоғида глобал ва минтақавий тинчлик, барқарорлик ва изчил тараққиётни таъминлаш, Ўзбекистон ва БМТ ўртасидаги кўп қиррали ҳамкорликни янада кенгайтириш масалалари, Барқарор ривожланиш мақсадларига эришишга қаратилган қўшма лойиҳаларни амалга ошириш ҳолати муҳокама қилинди”, дейилган президент матбуот хизмати хабарномасида.

Учрашувда томонлар Ўзбекистон билан БМТ ўртасидаги икки томонлама ҳамкорлик, халқаро ва минтақавий аҳамиятга молик муаммолар юзасидан ҳам фикр алмашишган, шунингдек, Афғонистонда юзага келаётган вазият муҳокама қилиниб, афғон халқига гуманитар ёрдамни кенгайтириш, жаҳон ҳамжамиятининг бу мамлакатга нисбатан умумий стратегиясини ишлаб чиқиш зарурлиги таъкидланган.

Ўзбекистон расмийлари Қорақалпоғистонда икки йил аввал бўлиб ўтган норозилик намойишларидан кейин ҳам республика мустақиллиги учун чақириқлар бўйича қатағонни кучайтиришда давом этмоқда, дея билдирди Human Rights Watch халқаро инсон ҳуқуқлари ташкилоти.

Ташкилотнинг 1 июль куни тарқатилган баёнотида айни пайтда расмий Тошкент 2022 йил июшида Конституцияга тузатишлар лойиҳасига қарши Нукусдаги норозилик чиқишларини бостиришда ҳаддан зиёд куч қўлланилгани учун бирорта ҳам юқори лавозимли мулозим жавобгарликка тортилмаганига эътибор қаратган.

“Ўзбекистон раҳбарияти нафақат икки йил аввал Қорақалпоғистондаги норозиликлар чоғида ҳалок бўлганлар учун адолатни таъминлай олмади, балки ўшандан бери бошқа қорақалпоқ фаолларига нисбатан репрессиялар сезиларли даражада оширганига гувоҳ бўлдик”, деган ташкилотнинг Европа ва Марказий Осиё бўйича директори Хью Уильямсон.

HRW вакилига кўра, Ўзбекистоннинг ҳамкорлари мамлакат раҳбариятини яна бир бор адолатни таъминлашга чақиришлари ҳамда Қорақалпоғистонда ҳам, хорижда ҳам фаолларга нисбатан давом этаётган таъқибларни қоралашлари лозим.

2022 йилнинг июль ойи бошида Қорақалпоғистонда аҳоли пойтахт Нукус шаҳрининг марказий майдонида оммавий норозилик акциясига чиққан. Одамлар Тошкентнинг Қорақалпоғистонни Ўзбекистон таркибидаги суверен республика мақомидан маҳрум этиш режасига шу йўсинда норозилик билдиришган. Ҳукумат намойишни куч билан бостирган.

Расмий Тошкент Нукус воқеаларида ҳуқуқ-тартибот идораларининг тўрт ходими дохил 21 киши ҳалок бўлди, деб баёнот берган.

2022 йил 7 ноябрида Human Rights Watch халқаро ташкилоти Ўзбекистон ҳукумати Нукусдаги норозилик акциялари чоғида ўқотар қурол қўллаганини даъво қилиб, очиқ текширув ўтказишга чақирди.

Ташкилот воқеалар гувоҳлари томонидан 2022 йил 1 июлидан 1 августигача бўлган даврда ижтимоий тармоқларда ёйинланган 55 та видеороликни верификация қилиб, 31 та видеоёзув ва фотосуратда ўқотар қуролдан ўлганлар ёки ярадорлар акс этганини аниқлаган.

Ўзбекистон ҳукумати юз берган воқеалар сабабларини ўрганиш мақсадида парламент ҳузурида махсус комиссия тузган, аммо тафтиш натижалари жамоатчиликка эълон қилинган эмас.

Нукус воқеалари бўйича ўтказилган судларда умумий ҳисобда 61 киши жавобгарликда тортилган. Улар орасида одамларни тинч норозилик акцияларига чақиргани айтилаётган блогер ва адвокат Даулетмурат Тажимуратов 16 йилга озодликдан маҳрум этилган.

“Фотон” акциядорлик жамиятининг устав капиталидаги 85,58 фоиз давлат улуши 151 миллиард сўмга сотилган. Бу ҳақда Давлат активларини бошқариш агентлиги матбуот хизмати маълумот тарқатди.

Давактив қайдича, хусусийлаштириш натижасига кўра “HAVVO GROUP” масъулияти чекланган жамияти ғолиб топилган ва 85,58 фоизлик улуш мазкур МЧЖга ўтган.

“Ғолиб томонидан келажакда Корхонанинг ишлаб чиқариш ҳажмини кўпайтириш, маҳсулотлар турини ва реализацияси географиясини янада кенгайтириш, бошқарув самарадорлигини ошириш, шунингдек корхона фаолиятига замонавий корпоратив бошқарув тизимларини жорий этиш ва барқарор ривожлантиришни таъминлаш режалаштирилган”, дейилган хабарномада.

“Фотон” заводи Иккинчи жаҳон уруши йилларида (1942 йил) Москва вилоятидаги “Радиолампа” заводининг Тошкентга кўчирилиши ортидан ташкил этилган. Маълумотларга кўра, бугунги кунда корхона 68 минг квадрат метрга тенг иккита ишлаб чиқариш майдонига эга.

Уч юз чоғли мутахассис ишлайдиган завод акцияларининг 85,58 фоизлик улуши шу кунгача давлатга тегишли бўлиб келган. Корхонада 30 дан зиёд турдаги яримўтказгич маҳсулотлари ва микросхемалар ҳамда турли электр жиҳозлари ишлаб чиқарилади. 2020 йил декабрида “Фотон” акцияларининг давлатга тегишли пакети россиялик инвесторларга таклиф этилган эди.

2023 йил декабрида “Фотон” акциядорлик жамияти ва унинг раҳбари Маърифхўжа Сайдумаров Украинанинг санкция рўйхатига киритилганди.

Бирлашган Миллатлар Ташкилоти бош котиби Антониу Гутерриш 30 июнь куни Ўзбекистонга етиб келган.

Ўзбекистон бош вазири матбуот хизмати тарқатган маълумотга мувофиқ, Гутерришни Тошкент аэропортида бош вазир Абдулла Арипов ва бошқа расмийлар кутиб олган.

“Қисқа суҳбатдан сўнг БМТ Бош котиби Ўзбекистон Ташқи ишлар вазири ҳамроҳлигида ўзи учун ажратилган қароргоҳга жўнаб кетди”, дейилган хабарномада.

Аввалроқ БМТ бош котиби Антониу Гутерриш Марказий Осиё давлатларига сафар доирасида жорий йилнинг 30 июнь − 1 июль кунлари Ўзбекистонга ташриф буюриши эълон қилинган.

Ташриф чоғида Гутерришнинг Ўзбекистон президенти Шавкат Мирзиёев билан музокаралар ўтказиши, музокаралар кун тартибидан Ўзбекистоннинг БМТ ва унинг институтлари билан кўп қиррали ҳамкорлигини янада кенгайтириш ва мустаҳкамлаш масалалари, шунингдек, глобал сиёсат ва минтақавий ҳамкорликнинг долзарб жиҳатлари ўрин олгани билдирилган.

“Ташриф давомида БМТ Бош котиби қатор саноат ва ижтимоий соҳа объектларини ҳам бориб кўради, икки томонлама учрашув ва тадбирлар ўтказади”, дейилганди президент матбуот хизмати томонидан 29 июнь куни тарқатилган хабарномада.

Telegram асосчиси Павел Дуров Ўзбекистонга сафари чоғида мамлакат президентининг президент давлат хавфсизлик хизмати раҳбари ўринбосари ва Мирзиëевнинг кенжа куëви Отабек Умаров билан учрашган. Бу ҳақда Отабек Умаров ўз телеграм-канали орқали маълум қилди.

“Мамлакатимизда ушбу хизматга алоҳида илиқ муносабат билдирилади, чунки Телеграм биз учун шунчаки биринчи рақамли мессенжердан каттароқ нарсадир”, деб ёзган Отабек Умаров ўзи учун “Павел [Дуров] ва унинг яқинларини меҳмондўст Ўзбекистон заминида қабул қилиш ҳақиқий шарафга айланган”ини урғулаган.

“Умид қиламизки, Тошкент, Бухоро ва Самарқанд шаҳарлари қолдирган таассуротлар ҳамда Телеграм фойдаланувчилари билан мулоқот уларга янги технологик ечимларни яратишга илҳом беради”, дея қўшимча қилган президент давлат хавфсизлик хизмати раҳбари ўринбосари Отабек Умаров.

Аввалроқ маҳаллий матбуотда Павел Дуров ўз жамоаси билан Тошкентга Ўзбекистонда TON криптовалютасини машруълаштириш масаласини ҳал қилиш ҳамда миллий тўлов тизимларига интеграция қилинган Telegram-банкни очиш масаласини муҳокама қилиш учун келаётгани ҳақида хабар пайдо бўлган эди. Дуровнинг бу масалаларни ўзбек расмийлари билан муҳокама қилиб-қилмагани, агар муҳокама қилинган бўлса, қандай келишувларга эришилгани ҳақида бирор-бир маълумот йўқ.

Дуровнинг Ўзбекистонга ташрифи арафасида маҳаллий матбуотда криптоактивлар ноқонуний айланмасида айбланган тошкентлик ва сурхондарёлик йигитлар 10 суткаданга қамалгани ҳақида хабарлар чиққан эди.

“Ўзатом” агентлиги ва “Росатом” давлат корпорацияси вакиллари кичик қувватли атом электр станцияси қурилиши шартномасининг кучга кириш тартиби тўғрисидаги баённомани имзолашди. Бу ҳақда “Ўзатом” агентлиги матбуот хизмати маълумот тарқатди.

Қайд этилишича, баённомани имзолаш маросими “Ўзатом” ва “Росатом” муҳандислик бўлими раҳбарларининг расмий учрашуви доирасида жорий йилнинг 26 июнь куни кичик қувватли атом электр станцияси майдонида бўлиб ўтган.

“Делегация куз ойида 6 блокли АЭС учун инфратузилма объектлари яратилиши режалаштирилаётган майдонни кўздан кечира туриб, штаб майдонида белгиланган вақтда қурилиш ишларини бошлаш – барча инфратузилма билан таъминланган қурувчилар шаҳарчасини барпо этишга киришиш борасида келишувни амалга ошириш юзасидан дастлабки масалаларни муҳокама қилди”, дейилган агентлик хабарномасида.

Делегация вакиллари қурилиш майдонига ташрифи доирасида Жиззах вилояти ҳокими Эргаш Солиев билан ҳам учрашишган.

Жиззах вилоятида Ўзбекистон билан Россия ҳамкорлигида кам қувватли атом электр станцияси қурилишига доир битим имзолангани Россия президенти Владимир Путиннинг май ойи охирида Тошкентга ташрифи чоғида эълон қилинган эди.

“Ўзатом” ва “Росатом”нинг ўша пайтда тарқатилган қўшма баёнотида Жиззах вилоятида 330 МВт қувватга эга (ҳар бири 55 МВт қувватли олтита ректор) иншоот қурилиши ёзда бошланиши билдирилган.

“Танланган майдон аллақачон текширилган, яроқлилиги ва хавфсизлиги тасдиқланган, бу лойиҳани амалга ошириш вақтини сезиларли даражада қисқартиради”, дейилганди расмий хабарномада.

Президент Шавкат Мирзиёев Ўзбекистонда қурилажак АЭСни “ҳаётий аҳамиятга эга лойиҳа” деб атаган.

Айни пайтда АЭС қуриш лойиҳаси жамоатчилик муҳокамасисиз Россияга бериб юборилгани ижтимоий тармоқ фаолларининг кескин эътирозига сабаб бўлган. Жамоатчилик АЭС Кремль қўлида Ўзбекистонга қарши “шантаж қуроли” бўлиб қолишидан хавотирда.

Бу орада Озодликка Ўзбекистон маҳаллий матбуотида АЭС мавзусини танқидий руҳда ёритиш ман қилинганига оид маълумотлар ҳам келиб тушган.

28 июнга ўтар кечаси Тошкент шаҳрининг Шайхонтоҳур тумани Беруний кўчасида жойлашган “Чорсу” бозор ҳудудидаги савдо дўконларида ёнғин чиққан.

Фавқулодда вазиятлар вазирлиги бозордаги ёнғинга оид маълумот ФВБга тунги соат 01:12 да тушгани, шундан сўнг беш дақиқа ичида воқеа жойига 12 та ёнғин-қутқарув экипажи етиб борганини маълум қилган.

Вазирлик қайдича, ёнғин соат 02:22 да қуршаб олинган, соат 02:47 га бориб эса тўлиқ бартараф этилган.

Хабарномада ёнғин натижасида тан жароҳати олган ва ҳалок бўлганлар тўғрисида хабар келиб тушмагани урғуланган.

ФВВ воқеа жойида вазият тўла назоратга олингани, у ерга фавқудодда вазиятлар вазири етиб боргани, вазир ҳамда тегишли ташкилотлар раҳбарлари у ерда ўрганиш ишларини олиб бораётганини қўшимча қилган.

Ўзбекистонда вояга етмаган қизчани мунтазам равишда зўрлаб келган эркак қўлга олинган. Бу ҳақда Ўзбекистон президенти ҳузуридаги Ижтимоий ҳимоя миллий агентлиги матбуот хизмати маълумот тарқатди.

Агентлик қайдича, беш фарзанднинг отаси бўлган “блогер ниқоби остидаги” 31 яшар А.К. “бошқа бир эркак билан расмий никоҳи бекор қилинмаган аёлни ўзига иккинчи хотин қилиб олган”.

Хабарномада иккинчи хотинининг 11 яшар қизини ҳам мунтазам равишда зўрлаб келгани айтилаётган А.К.га нисбатан мамлакат Жиноят кодексининг 119-моддаси 4-қисми (Жинсий эҳтиёжни зўрлик ишлатиб ғайритабиий усулда ўн тўрт ёшга тўлмаган шахсга нисбатан қондириш) билан жиноят иши қўзғатилгани маълум қилинган.

Вояга етмаган жабрланувчига эса “агентлик томонидан зарур тиббий, психологик ва ижтимоий кўмак кўрсатилмоқда”.

Ўзбекистон президенти Шавкат Мирзиёев 26 июнь куни Тошкентда бўлиб турган Туркия миллий мудофаа вазири Яшар Гулер бошчилигидаги делегацияни қабул қилган.

Президент матбуот хизмати маълумотига кўра, қабул чоғида икки мамлакат ўртасидаги ҳарбий ва ҳарбий-техник ҳамкорликни ривожлантириш истиқболлари, жумладан, яқин идоралараро алоқаларни мустаҳкамлаш, қўшма тадбирлар ташкил этиш, ҳарбий мутахассисларни тайёрлаш ва бошқа масалалар муҳокама қилинган.

“Хавфсизлик соҳасида, терроризм, экстремизм ва радикализмга қарши курашишда ҳамкорликни мустаҳкамлаш ва мувофиқлаштиришга алоҳида эътибор қаратилди”, дейилган хабарномада.

Шунингдек, Шавкат Мирзиёев Туркия делегацияси вакиллари билан Марказий Осиёда тинчлик ва барқарорликни таъминлаш масалалари, шу жумладан Афғонистондаги вазиятни ҳам муҳокама қилган.

Ўзбекистон Мудофаа вазирлиги матбуот хизмати қайдича, Тошкентга келган турк ҳарбий делегациясига мудофаа вазири Баҳодир Қурбонов бошчилигидаги ўзбек ҳарбийлари мезбонлик қилмоқда.

Ўзбекистонда 2024/2025 ўқув йили учун олий ва профессионал таълим муассасаларига ҳужжат қабул қилиш ишлари поёнига етган. Бу ҳақда Билим ва малакаларни баҳолаш агентлиги матбуот хизмати маълумот тарқатди.

Агентлик қайдича, тест синовларида иштирок этиш учун 894 минг 279 нафар абитуриент рўйхатдан ўтган. Булардан 410 минг 334 нафари жорий йил битирувчилари, 483 945 нафари эса аввалги йиллар битирувчиларидир.

Абитуриентлар энг кўп Тошкент шаҳрида (161 минг 369 нафар), Самарқанд вилояти (93 минг 92 нафар) ва Қашқадарё вилоятида (89 минг 188 нафар) тест топшириши маълум бўлган.

Абитуриентларнинг 784 минг 458 нафари таълим тили ўлароқ ўзбек тилини, 84 минг 774 нафари рус тилини, 22 минг 534 нафари қорақалпоқ тилини, 2 минг 513 нафари эса бошқа тилларни танлашган.

Билим ва малакаларни баҳолаш агентлиги абитуриентларга тест синовларида иштирок этиш учун тўловни 26 июнь соат 23:59 гача амалга ошириш лозимлигини эслатган.

Россиянинг Калининград вилоятида суд вояга етмаган қизалоққа тегажоғлик қилган ўзбекистонлик шахсга нисбатан 14 йилга озодликдан маҳрум қилиш ҳақида ҳукм чиқарган.

РИА Новости хабарига кўра, ўзбекистонлик 59 ёшли Ш. ўтган йилнинг август ойида Шевченко кўчасидаги уйлардан бирининг ёнида 11 яшар қизчани кўриб қолган.

У автобус бекатигача бўлган йўлни кўрсатиб қўйиш баҳонасида қизчани меҳмонхона томонга олиб кетган. Йўлда у қизчага ўпишишни таклиф қилган, қизалоқ буни рад қилган.

“Эркак унинг футболкасини ечишга ҳаракат қилган, қизча қаршилик қила бошлагач эса унинг юзидан тишлаб олиб, велосипедига ўтириб, кетиб қолган”, дейилган агентлик хабарида.

Суд ўзбекистонлик эркакни Россия Жиноят кодексининг “14 ёшга етмаган шахсга нисбатан зўрлик ишлатган ҳолда шаҳвоний ҳаракатлар содир этганлик” моддаси бўйича айбдор деб топган.

Суд қарори билан 14 йилга кесилган ўзбекистонлик Ш. жазони қаттиқ тартибли колонияда ўтайдиган бўлган.

Ўзбекистонда педагогларни касбий ривожлантириш ва янги методикаларга ўргатиш миллий-тадқиқот институти негизида Абдулла Авлоний номидаги педагогик маҳорат миллий институти ташкил этилади.

Бу тартиб, “Ҳуқуқий ахборот” Telegram канали қайдича, мамлакат президентининг 21 июнь куни қабул қилинган “Мактабгача ва мактаб таълими ташкилотлари ходимларини узлуксиз касбий ривожлантириш тизимини такомиллаштириш бўйича қўшимча чора-тадбирлар тўғрисида”ги қарорида кўзда тутилган.

Қарорга мувофиқ, Тошкент шаҳар педагогларни янги методикаларга ўргатиш миллий маркази ҳамда Низомий номидаги Тошкент давлат педагогика университети тасарруфидаги Республика педагогик таълим ресурс маркази фаолияти уларни Педагогик маҳорат миллий институтига қўшиш орқали тугатилади. Институт тузилмасида Халқаро тадқиқотлар маркази ташкил этилади.

Қарор билан 2024/2025 ўқув йилидан мактабгача ва мактаб таълими ташкилотлари раҳбар, педагог ва мутахассис кадрларини қайта тайёрлаш ва малакасини оширишнинг яхлит тизими жорий қилиниши белгиланган.

Бунда мактабгача таълим ташкилотлари директор ва мутахассисларини қайта тайёрлаш ва уларнинг малакасини ошириш институти Мактабгача ва мактаб таълими вазирлиги бўйсунувига ўтказилади, шунингдек, мактабгача таълим ташкилотларининг педагог ва мутахассис кадрларини узлуксиз касбий ривожлантириш бўйича “Виртуал касбий ривожлантириш” электрон дастури жорий этилади.

Ўзбекистон президенти Шавкат Мирзиёев 25 июнь куни амалий ташриф билан Тошкентга келган Россия ички ишлар вазири Владимир Колокольцевни қабул қилган.

Президент матбуот хизмати маълумотига кўра, қабул чоғида терроризм, экстремизм, наркотрафик ва уюшган жиноятчиликка қарши курашиш, шунингдек, киберхавфсизлик ва рақамли экспертиза соҳаларидаги ҳамкорликнинг долзарб жиҳатлари муҳокама қилинган.

“Миграция соҳасида ҳамкорлик механизмларининг самарадорлигини ошириш масалаларига алоҳида эътибор қаратилди”, дейилган хабарномада.

Россиядаги ўзбек мигрантлари билан боғлиқ масалаларни Владимир Колокольцев 25 июнь куни Тошкентда ўзбекистонлик ҳамкасби Пўлат Бобожонов билан ҳам муҳокама қилган.

Ички ишлар вазирлиги ахборот хизмати қайдича, учрашувда тарафлар Россия ҳудудида бўлиб турган Ўзбекистон фуқаролари, шунингдек Ўзбекистондаги Россия фуқароларининг ҳуқуқ ва эркинликларини таъминлаш, улар орасида ҳуқуқбузарликларни олдини олиш ва ноқонуний миграция ҳолатларига барҳам бериш, жиноятчилик, шу жумладан кибержиноятлар, фирибгарлик, гиёҳванд моддаларнинг ноқонуний айланиши ҳамда бошқа трансмиллий уюшган жиноятларга қарши курашиш, шунингдек қидирувдаги шахсларни ушлашда соҳа хизматларининг ҳамкорлигига эътибор қаратишган.

“Шунингдек, томонлар ички ишлар органлари учун кадрлар тайёрлаш ва уларнинг малакасини ошириш ҳамда илмий-тадқиқот йўналишида алоқаларни мустаҳкамлаш зарурлигини таъкидлаб ўтдилар”, дейилган ИИВ хабарномасида.

Россия президенти Владимир Путиннинг ишонган мулозимларидан бири ўлароқ билинадиган Владимир Колокольцев шу йилнинг май ойида РФда ҳукумат алмашган пайтда ҳам вазирлик курсисини сақлаб қолишга муваффақ бўлган.

Олий Мажлис Қонунчилик палатаси депутатлари 25 июнь куни “Ўзбекистон Республикасида чет эл фуқароларининг ва фуқаролиги бўлмаган шахсларнинг ҳуқуқий ҳолати тўғрисида”ги Ўзбекистон Республикасининг Қонунига ўзгартириш ва қўшимчалар киритиш тўғрисида”ги қонун лойиҳасини учинчи ўқишда қабул қилишган.

Қуйи палата матбуот хизмати маълумотига кўра, мажлисда мазкур қонун лойиҳаси “ҳозирги глобаллашув шароитида Ўзбекистон суверенитети ва ҳудудий яхлитлигини муҳофаза қилиш бўйича қўшимча чора-тадбирлар белгилаш заруратидан келиб чиқиши” қайд этилган.

Ҳужжат билан чет эл фуқаролари ва фуқаролиги бўлмаган шахсларнинг Ўзбекистон Республикасида бўлишини номақбул деб топиш асослари ва тартиби белгиланади.

Қонун лойиҳасига мувофиқ, чет эл фуқаролари ва фуқаролиги бўлмаган шахслар томонидан “Ўзбекистоннинг давлат суверенитетига, ҳудудий яхлитлигига ва хавфсизлигига зид бўлган, давлатлараро, ижтимоий, миллий, ирқий ҳамда диний адоватни келтириб чиқарувчи, Ўзбекистон халқининг шаъни, қадр-қимматини ёки тарихини таҳқирловчи мазмундаги оммавий чиқишлар қилиш ёхуд ҳаракатлар содир этиш уларни Ўзбекистон Республикасида бўлиши номақбул деб топиш учун асос бўлиши мумкин.

Лойиҳада мамлакатда бўлиши номақбул деб топилган шахсларга беш йил давомида Ўзбекистонга кириш, банкларда ҳисобварақ очиш, кўчмас мулк сотиб олиш, давлат мулкини хусусийлаштиришда иштирок этиш, молиявий ва шартномавий муносабатларга киришишни тақиқлаш таклиф этилган.

“Қонун лойиҳасида мамлакатда бўлиши номақбул деб топилган шахсларни депортация қилиш асослари ва тартиби ҳам назарда тутилган”, дейилган палата матбуот хизмати хабарномасида.

Қайд этилишича, лойиҳа бўйича мунозаралар чоғида депутатлар қонун лойиҳасининг қабул қилиниши Ўзбекистоннинг давлат суверенитети, ҳудудий яхлитлиги ва хавфсизлигини мустаҳкамлашга, мамлакатда давлатлараро, миллатлараро, динлараро аҳиллик, тотувликни ҳимоя қилишга ҳамда Ўзбекистон халқининг шаъни, қадр-қиммати ва тарихи ҳурмат қилинишини таъминлашга хизмат қилишини таъкидлашган.

Қонунчилик палатасининг бир гуруҳ депутатлари томонидан ишлаб чиқилган мазкур қонун лойиҳаси қуйи палатага кўриб чиқиш учун киритилгани ҳақида тақрибан икки ҳафта муқаддам маълум бўлган эди. Ўша пайтда лойиҳа “Қозоғистон, Озарбайжон, Россия Федерацияси, Польша, Беларусь, ХХР каби давлатларнинг илғор тажрибасидан келиб чиққан” ҳолда ҳозирлангани билдирилганди.

Бунинг ортидан ижтимоий тармоқларнинг ўзбек сегментида қонун лойиҳаси юзасидан турли мунозаралар кузатилган, ўзбекистонлик айрим фойдаланувчилар бу ҳужжатга Россиянинг “хорижий агентлар”га оид баҳсли қонунидагига ўхшаш моддалар киритилиб қолиши мумкинлигидан хавотир изҳор этган эдилар.

Мазкур лойиҳа қонун мақомини олиши учун Олий Мажлис Сенати томонидан маъқулланиши ва мамлакат президенти томонидан имзоланиб, расмий матбуотда эълон қилиниши лозим.

Жорий йилнинг январь-май ойларида Ўзбекистонга туристик мақсадда ташриф буюрган хорижликлар сони 2,8 миллион нафардан ошган.

Статистика агентлиги қайдича, бу кўрсаткич ўтган йилнинг шу даври билан солиштирганда 9,6 фоизга (248,2 минг нафарга) кўпдир.

Ўзбекистонга энг кўп турист йўллаган мамлакатлар учлигига мамлакатнинг минтақадаги қўшнилари – Тожикистон, Қирғизистон ва Қозоғистон кирган. 2024 йилнинг беш ойи давомида Ўзбекистонга, хусусан 871,5 минг нафар тожикистонлик, 857 минг нафар қирғизистонлик ва 498,2 минг нафар қозоғистонлик келиб кетган. Бу уч мамлакат фуқаролари Ўзбекистонга туристик мақсадда ташриф буюрганларнинг қарийб 80 фоизини ташкил этган.

Бундан ташқари январь-май ойларида Ўзбекистонга Россиядан 289,6 минг нафар, Туркманистондан 53,8 минг нафар, Туркиядан 42,1 минг нафар, Ҳиндистондан 23,2 минг нафар, Хитойдан 22,8 минг нафар, Италиядан 15,3 минг нафар, Жанубий Кореядан 15,1 минг нафар, бошқа давлатлардан эса жами 148,7 минг нафар турист келган.

Агентлик туристларнинг 2 миллион 237 минг 400 нафари Ўзбекистонга қариндошларини йўқлаш, 426 минг 500 нафари сайёҳлик, 68 минг 400 нафари хизмат юзасидан, 51 минг 500 нафари тижорат, 46 минг 200 нафари даволаниш, 7 минг 400 нафари эса ўқиш мақсадида келганини маълум қилган.