Ўқув йили бошланишига саноқли кунлар қолганида Тошкентдаги барча бозорларда мактаб анжомлари сотиладиган савдо расталари жорий қилинди.
Эски Жўва бозори ҳудудида жорий қилинган махсус расталарда савдо авжида. Сотувчи Назокатхоннинг айтишича, шу кунларда ҳаво ҳарорати кескин кўтарилиб кетганига қарамасдан, бозорга келаётган одамларнинг кети узилмаяпти.
- Кунлар исиб кетган, аммо одамлар барибир келишяпти. Дарслар бошланишига озгина қолган-ку, шунга ота-оналар фарзандларига керакли нарсаларни олишга шошилишяпти. Ҳамма нарсалардан олишяпти – дафтардан тортиб чизғичгача. Савдо яхши, кўз тегмасин, - дейди раста сотувчиси Назокатхон.
Пиёз нархи анча пасайди
Пиёз сотувчиси Холмуроджонга кўра, Ҳайит байрамидан кейинги қимматчилик анча қайтган.
- Пиёзлар байрамдан кейин 2 000-2 500 сўмга кўтарилиб кетган эди. Россиягаям сотишди роса, менимча. Ҳозир нархлар тушди, 1 килоси 1 200 – 1 300 сўм. Кимдир сўраб кетади, бошқалар эса олишяпти, - деди сотувчи.
Бодринг тортилган, помидор арзон
Бодринг камайишига, сотувчиларнинг айтишларича, мавсум якунланаётгани ва экспорт ҳажми ортгани сабаб бўлган. Кейинги кунларда унинг нархи ошиши мумкин, деган тахминлар айтилмоқда. Иссиқ кунларда сифатини тез йўқлтаётган помидор эса арзонлади. Шу кунда унинг килограммига минг сўмдан сотилмоқда.
Гўшт ҳамон қиммат
Харидорлар зорланишича, гўшт нархи тушишидан дарак йўқ.
- Иссиқ кунларда гўштли овқат унча ейилмайди, сезонимас. Шунга қарамасдан, гўштнинг нархи ё кўтарилади, ё турғун ҳолатда қолади. Менимча, чет давлатлар билан бир хил бўлиб қолди, 10 доллар атрофида-я килоси. Нарх тушиши охирги вақтларда умуман кузатилмаяпти, - дейди харидор Турсунбой ота таассуф билан.
Соҳадан хабардор кишиларнинг айтишларича, Қашқадарё ва Қирғизистондан келаётган қорамол сони ўзгаришсиз қолмоқда. Бошқа давлатлардан келтирилаётган гўшт ҳажми эса жуда оз.
Эски Жўва бозори
Озиқ-овқат:
| Мол гўшти - 1 кг (лаҳм) | 29 500 – 30 000 сўм |
| Мол гўшти - 1 кг (суякли) | 26 500 – 27 000 сўм |
| Қўй гўшти - 1 кг | 26 000 – 28 000 сўм |
| Картошка - 1 кг | 1 500 – 1 600 сўм |
| Сабзи - 1 кг | 1 000 – 1 100 сўм |
| Пиёз - 1 кг | 1 200 – 1 300 сўм |
| Бодринг - 1 кг | 1 500 – 1 600 сўм |
| Помидор - 1 кг | 1 000 – 1 100 сўм |
| Ўсимлик ёғи - 1 л (Золотая семечка) | 5 000 – 5 500 сўм |
| Ун - 1 кг (Олтин Дон) | 2 500 сўм |
| Гуруч - 1 кг | 4 000 сўмдан 6 500 сўмгача |
| Шакар - 1 кг | 2 800 – 3 000 сўм |
| Ош тузи – 1 кг | 1 000 – 1 200 сўм |
Мактаб анжомлари:
| Дафтар - 1 дона (12 варақ) | 175 сўм |
| Дафтар - 1 дона (40 варақ) | 750 сўм |
| Кундалик - 1 дона | 3 000 – 3 500 сўм |
| Ручка - 1 дона | 500 – 1 500 сўм |
| Қалам - 1 дона | 800 сўм |
| Чизғич - 1 дона | 500 – 1 000 сўм |
| Портфель - 1 дона | 25 000 сўмдан 55 000 сўмгача |
| Рангли фломастер - 1 қути | 8 000 – 8 500 сўм |
