10 март куни кутилмаганда вафот этган шайх Муҳаммад Содиқ Муҳаммад Юсуф кўп йиллар давомида Озодлик радиосида диний шарҳловчи сифатида ҳам ишлаган. Марҳум 1993-97 йилларда Ливияда мажбурий муҳожиратда яшаган пайтларданоқ Озодлик билан ҳамкорлик қила бошлаган. 2007 йилгача давом этган ҳамкорлик натижасида “Қадриятлар” диний-маърифий дастури тингловичлар эътиборига ҳавола қилинган. Марҳум шайх Озодликнинг долзарб ижтимоий-сиёсий мавзуларда тайёрлаган дастурларида ҳам фаол иштирок этган эди. Жумладан, 2006 йилнинг 19 февраль куни эфирга берилган Қурултой дастурининг “Ислом ва демократия” мавзусидаги сонида Муҳаммад Содиқ Муҳаммад Юсуф иштирок этган эди.