Тошкентда Hyatt Regency меҳмонхонаси ишга туширилди
Interfax агентлигининг Тошкент шаҳар ҳокимиятига таяниб хабар беришича, ШҲТ саммити арафасида пойтахтда Hyatt Regency меҳмонхонасининг қурилиши охирига етди.
Меҳмонага биринчи бўлиб ШҲТ саммитига келган Россия делегацияси вакиллари жойлаштирилгани хабар қилинади.
Hyatt Regency меҳмонхонаси қурилиши уч йил муқаддам бошланганди.
301 ўринли ушбу меҳмонхона 205 миллион долларга қуриб битказилди.
Юлдуз Усмонова ШҲТга бағишлаб қўшиқ куйлади
Ўзбекистон халқ артисти Юлдуз Усмонова Шанхай ҳамкорлик ташкилотига бағишлаб қўшиқ куйлади.
Усмоновага кейинги бир неча йилдан буён катта саҳнага чиқишига тақиқ қўйилган. Уни радио-телевидение ва давлат тадбирларига таклиф қилишмаяпти.
Танқидчилар Усмонованинг ШҲТ саммити олдидан қилган янги хонишини катта саҳнага қайтиш уринишлари ўлароқ баҳолашмоқда.
Тошкент саммит кунлари визаси тугаган хорижликларни жазоламасликка ваъда қилди
Ўзбек расмийлари ШҲТ саммити кунлари Ўзбекистонда юриш визаси муддати тугаган чет элликларни жазоламоқчи эмас. Бу ҳақда Ўзбекистон Ташқи ишлар вазирлиги ўз сайти орқали маълум қилади.
“Тошкент шаҳрида Шанхай ҳамкорлик ташкилотига аъзо давлатлар раҳбарлари кенгаши мажлиси ўтказилиши муносабати билан Ўзбекистон аэропортларидан халқаро авиарейсларнинг келиш ва кетиш вақтларидаги эҳтимолий ўзгаришлар ҳамда қўшни давлатлар билан чегаралардаги айрим ўтиш жойларида вақтинчалик чекловлар ўрнатилиши муносабати билан 2016 йилнинг 23-24 июнь кунлари чет эл фуқароларининг кириш визаларида қайд этилган Ўзбекистон ҳудудида бўлиш муддатлари уларга боғлиқ бўлмаган ҳолда тугаганда уларга нисбатан Ўзбекистоннинг тегишли органлари томонидан жарима ёки бошқа чоралар қўлланилмайди”, дейилади Ташқи ишлар вазирлиги хабарномасида.
Аввалроқ саммит муносабати билан Ўзбекистон қўшни давлатлар билан чегарани 10 кунга ёпиши, 24 июнь куни эса Тошкент аэропорти 5 соатга ёпилиши хабар қилинган.
Атамбоев Тошкентга бормаслик фикридан қайтди
ШҲТга аъзо барча мамлакатлар, яъни Россия, Хитой, Тожикистон, Қирғизистон ва Қозоғистон раҳбарлари Тошкент саммитига келишини тасдиқлаган. Бу ҳақда Ўзбекистон Ташқи ишлар вазирининг ўринбосари Анвар Носиров 20 июнь куни Тошкентда ўтказилган брифинг чоғида билдирган.
Вазир муовинига кўра, Тошкент саммитида ШҲТда кузатувчи мақомига эга Афғонистон, Беларусь, Мўғулистон, Покистон президентлари, Ҳиндистон бош вазири ва Эрон ташқи ишлар вазири ҳам иштирок этади. Бундан ташқари, Ўзбекистон саммитга меҳмон сифатида Туркманистон президенти Қурбонқули Бердимуҳаммедовни ҳам таклиф этган.
Эслатиб ўтамиз, Қирғизистон президенти Алмазбек Атамбаев шу йил 24 март куни журналистлар олдида қилган чиқишида июнь ойида Тошкентда бўлиб ўтадиган саммитда қатнашмаслигини билдирганди. Атамбаев бу баёнотни ўша пайтда ўзбек-қирғиз чегарасида юзага келган таранг вазият туфайли берган.
8 март куни Қирғизистон жанубидаги Ахси туманига қарашли Чаласарт участкасига Ўзбекистон 40 чоғли аскар ва ҳарбий техника киритганди. Бунга жавобан Қирғизистон ҳам шунча аскар ва техника киритган. Орадан 8 кун ўтгач, музокаралардан сўнг Ўзбекистон ўз аскарларини Чаласартдан олиб чиқиб кетган.
Кеча Атамбоевнинг Тошкентга келиши ҳақидаги хабар тарқалди.
