Олмаота аэропорти 9 январгача ёпилди
Олмаота аэропорти 9 январгача ёпилди ва ани пайтда аэропорт фақат ҳарбий учоқларни қабул қилмоқда, деб хабар берди “Sputnik Казахстан”.
Аввалроқ “Турк ҳаво йўллари” ширкати Қозоғистоннинг Нур-Султон, Олмаота ва Ақтау шаҳарларига парвозларни 9 январгача тўхтатгани маълум қилинганди.
Айтилишича, ҳозирда Истанбул аэропортида ватанига қайтишни кутаётган юзлаб Қозоғистон фуқаролари бор.
Қозоғистоннинг “Эйр Астана” ширкати ҳам Туркиядан Қозоғистонга рейсларни вақтинча тўхтатди. Айни чоғда Истанбулдан Чимкентга парвоз одатий тартибда амлага оширилмоқда.
Uzbekistan Airways ширкати Қозоғистон шаҳарларига 8–13 январь кунларига белгиланган парвозларни бекор қилганини маълум қилди.
Латвия фуқаро авиацияси агентлиги авиаширкатларга Қозоғистон ҳаво ҳудудидан фойдаланмасликни тавсия этди.
Қозоғистондаги КХШТ ҳарбийлари сони қанча?
Коллектив хавфсизлик шартномаси ташкилоти – КХШТ Бош котиби Станислав Зась матбуотга берган маълумотига кўра, Қозоғистонга жўнатиладиган "тинчликпарвар кучлари" сони 2500 кишини ташкил қилади ва агар зарурат туғилса, ҳарбийлар сони 3600 нафарга етказилди
Россия, Белорус ва Арманистон ҳарбийлари Қозоғистонга етиб борган. Қирғизистон парламенти Қозоғистонга 150 нафар ҳарбий юборишни маъқуллади.
6 январь куни Станислав Зась Қозоғистонга киритилган "тинчликпарвар кучлар"нинг агар "қуролли тўда" ҳужум қилса, уларга қарши қурол ишлатиш ҳуқуқи борлигини айтди. Бу ҳақда РИА "Новости" агентлигига берган интервьюсида гапирган Зась "тинчликпарвар кучлар"нинг Қозоғистонда қолиш муддати ушбу мамлакат мудофаа вазирлиги билан шартнома орқали белгиланишини билдирди.
Бойқўнғирда уч кишидан ортиқ гуруҳ бўлиб кўчага чиқиш тақиқланди
“Фуқароларнинг оила аъзоларини мустасно қилганда, уч кишидан ортиқ гуруҳ бўлиб юриши, шунингдек вояга етмаганларнинг катталар ҳамроҳлигисиз ҳаракатланиши мумкин эмас”, дейилади Бойқўнғир маъмурияти сайтида эълон қилинган хабарномада.
Шаҳарда алкоголли ичимликлар чакана савдоси бутунлай тақиқланган, транспорт ҳаракати ва одамларнинг тунги 23.00 дан эрталаб 06.00 гача назорат-текширув жойларидан ўтиши чекланган.
Комендантлик соати вақтида фуқаролар турар-жойини фақат ҳаёти ва соғлиғига тўғридан-тўғри таҳдид бўлган ҳолларда ёки хизмат тақазосига кўра (тегишли ҳужжатлар бўлиши шарти билан) тарк этишлари мумкин.
Мазкур чора-тадбирлар жамоат тартибини сақлаш ва коронавирус инфекцияси тарқалишини тўхтатиш зарурати билан изоҳланмоқда. 7 январдан 19 январгача шаҳарда юқори (“кўк”) даражали террористик хавф эълон қилинган.
“Дождь”: Қозоғистон ҳукумати пойтахтни “Нур- Султон” деб аташни тўхтатди
Қозоғистон ҳукумати расмий хабарларда мамлакат пойтахтини “Нур-Султон” деб аташни тўхтатди. Бу ҳақда Orda.kz журналисти Гулнара Бажкеновага таяниб хабар қилган “Дождь” телеканалига кўра, эндиликда қозоқ ҳукумати фақат "мамлакат пойтахти" деган иборани қўлламоқда.
Мамлакатдаги норозилик чиқишлари ортидан Нурсултон Назарбоев Хавфсизлик кенгаши раиси лавозимидан озод қилинган.
ORDA хабарига кўра, Назарбоев ва унинг қизлари ўз оилаларини олиб Қозоғистонни тарк этганлар. Мамлакатда фақат унинг акаси Болат Назарбоев қолган.
Икки кун аввал Талдиқўрғон шаҳрида Назарбоев ҳайкали ағдариб ташланди.