Миллий хавфсизлик қўмитасининг собиқ раиси Карим Масимов ҳибсга олинди
“Жорий йилнинг 6 январ куни Миллий хавфсизлик қўмитаси (КНБ) томонидан Қозоғистон Республикаси Жиноят кодексининг 175-моддаси 1-қисми бўйича давлатга хиёнат бўйича судга қадар тергов бошланди. Шу куни ушбу жиноятни содир этишда гумон қилиниб, КНБнинг собиқ раиси К. Қ. Масимов ва бошқалар қўлга олиниб, вақтинчалик сақлаш изоляторига жойлаштирилди. Тергов манфаатлари боис бошқа маълумотлар ошкор қилиниши мумкин эмас", - дейилади КНБ расмий сайтидаги хабарда.
Нурсултон Назарбоевнинг узоқ йиллик сафдоши бўлган 56 ёшли Карим Масимов 2016 йил сентябрида ҳукумат раҳбари лавозимидан КНБ раиси лавозимига кўчирилган эди. У 2014 йилнинг апрелидан бошлаб Миллий хавфсизлик қўмитаси раҳбари этиб тайинлангунига қадар 2007 йилдан 2012 йиллар давомида бош вазир лавозимида ишлаган.
6 январ куни Массимов КНБ раислигидан озод этилгани маълум бўлди. Бу лавозимда унинг ўрнига Давлат қўриқлаш хизмати бошлиғи лавозимида ишлаб келган Эрмек Сагимбаев тайинланди.
Қозоғистонда КХШТ кучларига генерал Сердюков раҳбарлик қилади. У Қримни аннексия қилишда қатнашган
Қозоғистонда КХШТ контингентига Россия Ҳаво десанти қўшинлари қўмондони генерал-полковник Андрей Сердюков раҳбарлик қилади. Бу ҳақда Россия Мудофаа вазирлиги расмий вакили Игорь Конашенковга таяниб, РИА Новости хабар қилди.
Россия Қозоғистонга ҲДҚнинг 45-бригадаси, 98-дивизияси ҳамда 31-алоҳида бригадаси бўлинмаларини йўллаган. Мудофаа вазирлиги барча ҳарбий хизматчилар жанговар тажрибага эгалигини урғулаган.
Сердюковнинг таржимаи ҳолига кўра, у Биринчи ва Иккинчи чечен урушларида, Россиянинг собиқ Югославиядаги ва Суриядаги ҳарбий амалиётларида қатнашган.
2014 йилда эса у Қримни Россияга қўшиб олишда иштирок этган ва шу туфайли Украина томонидан санкциядаги шахслар рўйхатига киритилган. Хусусан, “Известия” газетаси уни Қрим воқеаларининг “ажойиб ташкилотчиси” деб атаган.
ҲДҚ қўмондони III ва IV даражали “Ватан олдидаги хизматлари учун” орденлари ҳамда “Россия қаҳрамони” унвони билан тақдирланган.
Назарбоевнинг собиқ маслаҳатчиси: Олмаота аэропортига ҳужум олдидан қўриқчи аскарлар йиғиштириб олинган
“Иш шу қадар пухта ташкил қилинганки, ҳокимиятнинг юқори бўғинларидаги хоинларсиз буни амалга ошириб бўлмасди. Мендаги маълумотга кўра, аэропортга ҳужум уюштирилишига 40 дақиқа қолганда уни ҳалқа тарзида ўраб қўриқлаётган аскарларни йиғиб олишга буйруқ берилган. Бунақаси мамлакат хавфсизлигига жавобгар шахсларнинг ижозати билангина бўлиши мумкин. Бу давлатга хиёнат”, дея Ермуҳамет Ертисбаевнинг сўзларини келтирган Informburo.kz.
Ертисбаев иддаосича, Миллий хавфсизлик қўмитаси Қозоғистон тоғларида машғулот лагерлари ташкил қилингани ҳақидаги маълумотни сир тутган.
“Миллатга хиёнат ва фитна шуки, бир неча йил давомида тоғларда машғулот лагерлари бўлган. Вақти-вақти билан у ёки бу гуруҳни зарарсизлантирган МХҚ кўпдан-кўп бунақа лагерлар ҳақида сукут сақлаб келган”, деган Ертисбаев.
Олмаотада тўқнашувлар пайти вайрон бўлган полиция машиналари