ОАВ: Жамбил вилоят полицияси бошлиғи Жанат Сулеймановнинг вафот этгани айтилмоқда
Жамбил вилоят полицияси бошлиғи генерал Жанат Сулеймановнинг вафот этгани тўғрисида Vlast.kz нашри хабар берди. Нашрнинг ёзишича, бу маълумотни Қозоғистон Ички ишлар вазирлиги расмийси ҳам тасдиқлаган.
“Ҳозир Жанат Сулеймановнинг мавжуд эмаслиги ҳақиқат. Аммо қандай вазиятларда вафот этгани ўрганилмоқда”, -деб ёзди Tengrinews.kz Жамбил вилоят полицияси матбуот хизматига таянган ҳолда.
Полиция генерал-майори Жанат Сулейменов 1962 йилда туғилган. У 2020 йил февралидан бери Жамбил вилоят полициясини бошқариб келаётган эди.
Лукашенко Ўзбекистонни огоҳлантирди
Беларуснинг куч билан ҳокимиятда қолаётган раҳбари Александр Лукашенко Ўзбекистонни Қозоғистондаги воқеалардан "сабоқ чиқариш"га чақирди. Қозоғистонга ўз кучларини жойлаштирган КХШТнинг 10 январь кунги онлайн сессиясида гапирган Лукашенконинг даъво қилишича, ҳозирда Қозоғистондаги тартибсизликлар иштирокчиларининг "нигоҳи Ўзбекистонга қаратилган".
"Агар зарур сабоқлар чиқарилмаса, биздаги маълумотларга кўра - буни ўша жойда ҳам кўряпсиз - уларнинг нигои Ўзбекистонга ҳам қаратилади", деб айтди Лукашенко.
Унга кўра, Қозоғистондаги воқеалар ташқи кучлар омили мавжудлигини кўрсатган.
Ўзбекистон ҳукумати Лукашенконинг баёнотига муносабат билдирганича йўқ. КХШТдан четда қолаётган расмий Тошкент 5 январь куни Қозоғистон раҳбарияти ва халқи "мамлакатда тинчлик ва осойишталикни тиклаш ҳамда юзага келган муаммоларни ўзи мустақил ҳал қилиш учун етарли қатъият ва иродага эгалигига ишониши"ни билдирган.
Куч ишлатар тизим мулозимларининг сирли ўлими
Қозоғистонда сўнгги кунларда Ички ишлар вазирлиги ҳамда Миллий хавфсизлик қўмитасининг уч нафар юқори мартабали мулозими турли вазиятларда вафот этгани хабар қилинди.
10 январь куни Тараз шаҳрида Жамбил вилоят полицияси бошлиғи Жанат Мулеймановнинг ўлиги топилди. Қозоқ матбуотидаги хабарларга кўра, у ўз жонига қасд қилган. Аммо бунинг расмий тасдиғи йўқ.
Душанба куни эрталаб Миллий хавфсизлик қўмитаси - КНБ полковниги Азамат Ибраев ўз йида ўлик ҳолда топилгани хабар қилинган. Шунингдек, Олмаотанинг Турксиб тумани полиция бошлиғининг ўринбосари Танат Назановнинг "иш жойида" юрак хуружидан вафот этгани айтилмоқда.
Тоқаев Қозоғистондаги воқеаларни “давлат тўнтаришига уриниш” сифатида баҳолади
Қозоғистон президенти Қасим -Жомарт Тоқаев 10 январда КХШТга аъзо давлат раҳбарларининг навбатдан ташқари онлайн саммити доирасида сўзлаган нутқи пайтида мамлакатдаги воқеаларни “давлат тўнтаришига уриниш” сифатида баҳолади.
Тоқаев “давлат тўнтаришига уриниш” ортида қандай кучлар тургани тўғрисида гапирмади. У тартибсизликларда хориж фуқаролари иштирок этганини таъкидлаб, уларни “террорчилар” деб атади.
Қозоқ президенти тинч намойиш ўтказганларнинг талаблари инобатга олинганини, бажарилганини айтди. У тинч намойишчиларини тартибсизликларни уюштирганлар билан бир қаторга қўймаслик керак, деб билдирди.
Тоқаев КХШТ кучларини Қозоғистонга киритишга рози бўлгани учун Россия президенти Владимир Путинга алоҳида миннатдорчилик билдирди.