Россия зиёлилари урушга қарши очиқ хат эълон қилди
Россия олимлари ва илмий журналистлар Украина билан урушга қарши очиқ хат эълон қилишди. Унда, жумладан, шундай дейилади:
"Биз мамлакатими қуролли кучлари томонидан Украина ҳудудида бошланган ҳарбий ҳаракатларга қарши қатъий норозилик билдирамиз. Бу мудҳиш қадам кўплаб қурбонларга олиб келади ва амалдаги халқаро хавфсизлик тизими асосларига путур етказади. Европада янги уруш олови ёқилгани учун жавобгарлик тўлиғича Россиянинг зиммасида.
Бу урушни ҳеч нима билан оқлаб бўлмайди. Украина бизга яқин мамлакат ва шундай бўлиб қолади. Кўпчилигимизнинг Украинада қариндошларимиз, дўстларимиз ва илмий ишлар бўйича ҳамкасбларимиз бор. Бизнинг оталаримиз, бобо ва бобокалонларимиз нацизмга қарши елкама-елка жанг қилганлар. Шубҳали тарихий тахайюлга муккасидан кетган Россия Федерацияси раҳбариятининг геосиёсий амбицияларини деб уруш қилиш боболаримиз хотирасига нисбатан сурбетларча хиёнатдир.
Россия уруш оловини ёқиш билан ўзини халқаро изоляцияга, яккамохов-мамлакат бўлишга маҳкум этди. Бу шуни англатадики, эндиликда биз – олимлар ўз ишимиз билан кўнгилдагидек шуғуллана олмаймиз: зеро бошқа мамлакатлардаги ҳамкасблар билан тўлақонли ҳамкорлик қилмасдан илмий тадқиқотлар ўтказишни тасаввур қилиб бўлмайди. Россиянинг дунёдан ажратиб қўйилиши мамлакатимиз маданий ва технологик деградацияда давом этишини ва ижобий истиқболлар мутлақо қолмаганини билдиради. Украина билан уруш бу мавҳумликка томон қўйилган қадамдир".
Мактубни РФА академиклари Александр Аникин, Юрий Апресян, Виктор Васильев, Роальд Сагдеев, Александр Соболев, Сергей Стишов, Светлана Толстая, Ефим Хазанов ва бошқа ўнлаб олимлар ҳамда илм тарғиботчилари имзолашган.
Рейтер: SWIFTдан узиб қўйиш – Россияга қарши санкциялар туркумида бўлмайди
Европа Иттифоқи (ЕИ) Россияни Украинада ҳарбий амалиёт бошлагани муносабати билан SWIFT банк тизимидан узиб қўйиш чораларини кўрмоқчи эмас, деб хабар беради Рейтер ЕИдаги бир неча манбасига таянган ҳолда.
Украинага бостириб киргани учун Россияни SWIFTдан узиб қўйиш ташаббуси Болтиқмамлакатларидан чиқди. Чехия президенти Милош Земан ҳам буни янги санкциялар туркумига киритишга чақирди. Бироқ, агентлик таъкидлашича, бошқа мамлакатлар ҳозирча бунга тайёр эмас.
ЕИ мазкур қадам нафақат Россия банкларига, балки Европадаги кредиторларига ҳам зарба бўлади, деб ҳисобламоқда.
SWIFTдан узилган тақдирда кредиторлар Россиядан ўз маблағларини қайтариб ололмаслиги мумкин. Қолаверса, Россия банк тўловлари тизими муқобилини яратган, дейилади Рейтер хабарида.
“Ҳозирда биз учун устувор нарсалар бу суръат ва муросадир”, деган Рейтер манбаси бўлмиш ЕИ мулозими. Унинг фикрича, айни пайтда Россияни SWIFTдан узиб бўлмайди, чунки бундан Европа ҳам зарар кўради.
Яксон қилинган Россия ҳарбий техникалари
Киев яқинида 3 та рус ҳарбий вертолёти уриб туширилди
Киев расмийлари, Украина мудофаа кучлари Гостомель аэродроми яқинида Россиянинг 3 та ҳарбий вертолётини уриб туширганини маълум қилди.
Украина ИИВ берган маъумотга кўра, бу ҳудуд яқинига рус десантлари ташланган ва улар аэродромни олишга уринган.
Киевдвн 30 километр нарида ҳануз жанг ҳаракатлари бормоқда.