Совуқ сабаб мактаб ва олийгоҳларда қишки таътил бир ҳафтага узайтирилди
Ўзбекистонда аномал совуқ сабаб мактаб ва олийгоҳларда қишки таътил муддати яна бир ҳафтага узайтирилди.
Белгиланган тартибга кўра, мактаб ўқувчилари учун қишки таътил 11 январга қадар, олийгоҳларда эса 9 январга қадар давом этиши керак эди. Эндиликда ўқиш жараёнлари 18 январь, чоршанба кунидан бошланади.
Бу борадаги қарор "ҳаво ҳароратининг кескин пасайиши даврида аҳоли ўртасида, айниқса таълим ташкилотларида мавсумий грипп касаллигининг кескин кўпайишининг олдини олиш мақсадида” қабул қилингани қайд қилинди.
“Ўзгидромет” хабарига кўра, 10-15 январь кунлари мамлакат шимолида кечалари 17-22 даража совуқ, Устюрт ва чўл ҳудудларининг баъзи жойларида кечаси 25-27, кундуз кунлари 7-10 даража совуқ бўлиши кутилмоқда.
Тошкентда ҳам портлаш: 84 яшар қария жабрланди
Тошкентда ҳам янги йил арафаси газ портлаши бўлди. 30 декабрь куни пойтахтнинг Миробод тумани Содиқ Азимов кўчасида жойлашган кўп қаватли уйдаги хонадонларнинг бирида газ-ҳаво аралашмаси чақнаши юз берган.
Фавқулодда вазиятлар вазирлиги хабарига кўра, ҳодиса оқибатида 84 ёшли бир қария жабрланган.
Ўтган йили газ портлаши оқибатида келиб чиққан ёнғинларда ўлганларнинг аниқ сони маълум эмас. Ички ишлар вазирлиги фақат ис газидан қурбон бўлганларга оид маълумотни очиқлади холос.
Вазирликка кўра, Ўзбекистонда 2022 йилда 90 дан ортиқ ис гази билан заҳарланиш ҳолати қайд этилган. Оқибатда 146 нафар одам вафот этган, 50 киши жабрланган.
Расмийлар ис гази билан боғлиқ ҳодисаларга фуқаролар томонидан газ ва муқобил ёқилғи турларидан фойдаланишда хавфсизлик чораларига риоя этмаслик, қўлбола ясалган печлардан фойдаланиш сабаб бўлаётганини айтишади.
Фавқулодда вазиятлар вазирлиги фуқароларни техника хавфсизлик чораларига амал қилиш ҳақида огоҳлантириб келади, аммо бу каби ҳолатларда фуқароларга товон тўлаш ёки моддий ёрдам кўрсатиш кўзда тутилмаган.
Гулсумнинг қарзи сабаб уйи электрдан узилди
Қашқадарё вилояти Ғузор тумани Қоракўл маҳалласи Шўртан қўрғончасидаги ёғоч уйда уч ёш фарзанди ва касалманд кекса онаси билан совуқдан қийналиб яшаётган Гулсум Номозова яна Озодликка шикоят қилди. Гулсумнинг айтишича, у электр энергиясидан қарзини тўлай олмагани учун светини бутунлай узиб қўйишган.
Гулсум Зимистон-уз блогига дастлабки мурожаатидан сўнг маҳаллий раҳбарлар босимига учраганини айтади. У газ-свет муаммосидан шикоят қилгани учун ижара уйидан чиқариб юборилганига норозилик билдириб, 22 декабрь куни Тошкентга, Вазирлар Маҳкамасига борганди.
Ғузор туман ҳокимлиги Номозовани Тошкентдан қайтаришга муваффақ бўлган ва унинг ижара уйида қолишига рухсат берилган эди.
Гулсум турмушидан ажрашган. У ишсиз. Оила фақат “бола пули” ва онасининг нафақасига кун кўради.
Вазирлик ваъдасининг устидан чиқмади: Янги йилда ҳам свет ўчди
Энергетика вазирлиги хабарига кўра, Навоий, Жиззах, Андижон вилоятларида кучли шамол натижасида электр тармоқларида узилишлар кузатилмоқда.
Энергетика вазирлиги байрам кунлари мамлакатда чироқ ўчмаслигини ваъда қилиб, ҳатто электр ва газдан қарз бўлганлар ҳам байрамда тармоқдан узилмаслигини билдирган эди. Бироқ вазирлик бу ваъдасининг устидан чиқа олмаган. Кўпчилик вилоятларда аҳоли байрам куни ҳам чироқсиз ўтирганидан шикоят қилишди.