“Ўзбекнефтгаз”: Аномал совуқ туфайли станцияларда авариялар бўлмоқда
Кейинги икки кунда “Ўзбекнефтгаз” ширкатининг сиқув компрессор станцияларидаги газ ҳайдаш агрегатларида бир қанча авариялар содир бўлган.
Бунда аномал совуқни айблаган “Ўзбекнефтгаз”га кўра, аварияларга электр тизимидаги узилишлар ва шарли кранлар ҳамда қувурларнинг музлаб қолгани сабаб бўлган. Оқибатда сиқув компрессор станцияларидаги газ ҳайдаш агрегатлари аварияли ҳолатда тўхтаб қолган.
“Хусусан, Шўртан нефть ва газ қазиб чиқариш бошқармасининг “Шимолий Нишон” сиқув копрессор станциясидаги 3 та газ ҳайдаш агрегатлари, Муборак нефть ва газ қазиб чиқариш бошқармасининг “Зеварда” ва “Денгизкўл” конларидаги 2-сиқув копрессор станцияларида агрегатлар аварияли ҳолатда тўхтади”, дейилади ширкат баёнотида.
Ширкат тўхтаб қолган газ ҳайдаш агрегатлари ва технологик қурилмаларни навбатма-навбат ишга тушириш ишлари олиб борилаётганини қайд қилган.
Бироқ ажми қанча агрегат қанча муддатга тўхтаб қолгани ва бунинг натижасида кўрилган зарар ва оқибатлар очиқланмаган.
ФВВ: Кўчада қулоқчин тақманг!
Ўзбекистон Фавқулодда вазиятлар вазирлиги аномал об-ҳаво муносабати билан аҳолини эҳтиёт чораларини кўришга чақирди:
- Қор массалари, сумалак ва музлар бўлиши мумкин бўлган томлар, баланд уйларга яқинлашманг ва болаларнинг бундай жойларда ўйнаши ва бўлишига йўл қўйманг.
- Агарда хавфли жойда панжараси, огоҳлантирувчи белгилари мавжуд бўлса, улардан ўтишга уринманг, хавфли жойни бошқа йўл билан айланиб ўтинг.
- Қулоқчин таққан ҳолда кўчада юрманг, томдан тушаётган қор массалари шовқинини эшитмаслигингиз мумкин.
- Пиёдалар йўлакчаси бўйлаб ҳаракатланаётганда, юқори қаватларда шубҳали шовқинни эшитсангиз, тўхтамаслигингиз керак, бошингизни кўтаринг ва у ерда нима бўлганини ўйлаб кўринг. Эҳтимол, бу қор массалари ёки сумалак ва музлар тушаётган бўлиши мумкин. Бундай вақтда қочиб кета олмайсиз, имкон қадар тезроқ бино деворига ёпишиш керак, бу хавфсиз бўлишга хизмат қилади.
- Автотранспорт воситаларини томи баланд бинолар ёки тепасида қор массалари, сумалак ва музлар бўлган иншоотлар яқинига қўйманг.
- Агар одам томдан тушган қор массалари, сумалак ва музлар туфайли жароҳатланса, дарҳол тез ёрдам чақириш керак.
Қозоғистонда совуқ сабаб йўлда қолиб кетган 69 нафар Ўзбекистон ватандоши эвакуация қилинди
Қозоғистоннинг Актобе вилоятида ноқулай об-ҳаво сабаб йўлда қолиб кетган ўзбекистонликлар эвакуация қилинди.
Актобе Фавқулодда вазиятлар департаменти хабарига кўра, 11 январь куни иккита автобусда йўлда қолиб кетган жами 69 нафар Ўзбекистон ватандоши эвакуация қилинган.
Дастлаб Самара-Чимкент йўлида қолиб кетган автобусдан 38 нафар ўзбекистонлик ва 3 қозоғистонлик эвакуация қилиниб, Ирғиз туманидаги мактаблардан бирига жойлаштирилган.
Шу куни Самара-Чимкент йўлида жами 31 нафар ўзбекистонлик чиққан яна бир автобус йўловчилари эвакуация қилиниб, Қорабутоқ қишлоғи масжидига жойлаштирилган.
Иккала ҳолатда ҳам йўллар қалин қор сабаб беркилиб қолгани боис автобуслар йўлда қолиб кетган.
Амударё музлади
Амударёнинг Қорақалпоғистондан ўтган қисми музлади.
Қарақалпақгидромет хабарига кўра, Амударёнинг Мўйноқ туманидан ўтган қисми 11 январь куни музлаган.
Ташкилот эълон қилган видеода дарёнинг у қирғоғидан бу қирғоғигача музлагани акс этган.
Бир кун аввал худди шу жойдан эълон қилинган видеода дарё оқиб турганини кўриш мумкин.
Мўйноқ- Қорақалпоғистон шимолидаги туман бўлиб, Қозоғистоннинг Оқтўба ва Қизилўрда вилоятлари билан чегарадош.
Ўзгидромет хабарига кўра, Волгабўйи ҳудудларидан 10 январь куни кириб келган аномал совуқ Ўзбекистонда бир ҳафта давом этади. Мамлакат шимолида 30 даражагача совуқ бўлиши мумкин.
Ўзбекистонда ҳозирда кузатилаётган аномал совуқ ҳарорат бундан 15 йил аввал- 2008 йилнинг январь ойида кузатилганини маълум қилди Ўзгидромет.