Россиялик миллиардерлар бойлиги яна 50 млрд долларга ошди
2023 йилда энг бадавлат россиялик тадбиркорларнинг жами бойлигига 50 миллиард доллардан кўпроқ маблағ қўшилди.
РИА Новости агентлиги Bloomberg агентлиги тузган энг бадавлат одамлар рейтинги бўйича ҳисоб-китоб қилиб, шундай хулосага келган.
2022 йилда Bloomberg рейтингига кирган энг бадавлат россияликларнинг жами бойлиги 93,753 миллиардга камайган эди. Бунга уларга ва Россия иқтисодиётига қарши халқаро санкциялар сабаб бўлган.
Асли ўзбекистонлик миллиардер Алишер Усмонов 2023 йилда ҳам бойишда давом этган. The Guardian нашрига кўра, унинг жорий йилда бойлиги $1,88 млрдга ошиб умумий бойлиги — $20,3 млрдга етган. Нашрнинг маълумотларича, 2023 йилдаги иқтисодий ва сиёсий муаммоларга қарамай аксарият миллиардерларнинг бойлиги кўпайган.
Қримда Украина тарафдори бўлган махфий ташкилот фаолият юритмоқда
Қримда Украина тарафдори бўлган “Сариқ тасма” махфий ташкилоти фаоллари шиорлар ёзилган 100 дан ортиқ рус пулларини тарқатишди.
"Дўконда қайтим олаётганда, оккупантлар "Қрим - бу Украина", "Украина 2024 йилда ғалаба қозонади", "Украинанинг майдони 603 700 км²" деган ёзувларни кўради. Биз 100 дан ортиқ ана шундай банкнотларни тарқатдик”, дейилади “Сариқ тасма” ташкилоти баёнотида.
“Сариқ тасма” ташкилоти Украинанинг босиб олинган ҳудудларидаги украиналикларнинг қаршилик ҳаракатидир. Ҳаракат ташкилотчиларининг айтишича, яширин фаоллар сони бир неча мингдан ошади ва доимий равишда ўсиб бормоқда. Уларнинг фикрича, Қримдаги жамоа, айниқса Россия босиб олган Симферопол, Ялта, Евпатория ва Феодосия шаҳарларида фаол.
Россиянинг Белгород шаҳри яна ўққа тутилди
Россия расмийлари Белгород шаҳри кеча ҳам ўққа тутилгани ва бир киши ҳалок бўлганини билдирди.
Бир нафар фуқаро машинаси ёнига келиб тушган ракета зарбасидан ҳалок бўлди, яна беш киши жароҳат олди, деб хабар берди вилоят губернатори Вячеслав Гладков.
Гладков ўтган 24 соат ичида Украина шаҳарга дронлар ёрдамида камида 50 та ҳужум уюштирганини маълум қилди.
Белгородга шанба куни қилинган ҳужумда йигирмадан ортиқ одам ҳалок бўлган эди.
Россия ҳужумда Украинани айблади ва бир қанча ҳужумлар билан жавоб қайтарди
Россия Украинага ракета ва авиация зарбаларини оширмоқда
Сўнгги 24 соат ичида Россия қўшинлари Украина қўшинлари ва аҳоли пунктлари позицияларига 89 та ракета ва 72 та авиация зарбаси берди, шунингдек реактив тизимлардан 48 та ўқ узди.
Бу ҳақда Украина Қуролли кучлари бош штаби маълум қилди.