Юлия Навалная "Мудофаа Давоси" конференциясида нутқ сўзлади
Еврокомиссия президенти Урсула фон дер Ляен Мюнхенда ўтаётган хавфсизлик конференциясида Алексей Навалнийнинг вафоти муносабати билан унинг рафиқаси Юлия Навалнаяга ҳамдардлик билдирди.
“Азизим Юлия, сиз ва оилангиз кўп йиллар Алексей Навалнийни унинг курашида мардларча қўллаб-қувватладингиз. Бугун биз бутун оилангиз қаршисида бош эгамиз”, дейилади ЕИ расмий саҳифасида.
Юлия Навалная хавфсизлик йиғилишида турмуш ўртоғининг ўлими учун Россия президенти Владимир Путинни жавобгарликка тортишга чақирган.
Юзлаб сиёсатчилар, ҳарбий офицерлар ва дипломатлар Германиянинг Мюнхен шаҳрида ўтаётган «Мудофаа Давоси» деб номланган уч кунлик конференцияда йиғилди.
Йиғилишда Исроил ва Украинадаги уруш ҳамда АҚШда президентлик сайловидан кейин Вашингтоннинг мудофаа мажбуриятларини давом эттириши муҳокама мавзуси бўлиши кутилганди.
Аммо Навалнийнийнинг Россиядаги жазони ижро этиш колониясида вафот этгани ҳақидаги хабарлар йиғилиш мавзусини ўзгартириб юборди.
Ташкилотчилар Навалнийнинг рафиқаси Юлия Навалная сўзга чиқиши учун жадвалга ҳам ўзгартириш киритди.
М.Ходорковский: Мухолифат жавоб қайтаради!
Сургундаги россиялик тадбиркор ва Кремл танқидчиси Михаил Ходорковский жума куни Италиянинг RAI телеканалининг «In Mezz'ora» кўрсатувида қамоқдаги мухолифат етакчиси Алексей Навалний ўлимида Россия президенти Владимир Путин жавобгар эканлигини билдирди.
У Навалнийни истеъдодли сиёсатчи, "Россия келажагида жуда муҳим рол ўйнаши мумкин бўлган жуда жасур шахс" деб таърифлади.
"Ҳеч қандай шубҳа йўқ. Агар мамлакат раҳбари рақибини заҳарласа, кейин уни қамоққа ташласа, кейин уни узоқ шимолга юборса ва тўсатдан бутунлай соғлом одам у ерда вафот этса, "бу тасодифан содир бўлди" ва "бунга ҳеч ким айбдор эмас", деган гап бўлиши мумкин эмас. . . . Россия мухолифати бунга Москва кўчаларида сайлов куни ёки Алексей Навалнийнинг дафн маросими куни жавоб қайтаради," деди Ходорковский журналист саволига.
Россия бўйлаб камида 200 киши ҳибс этилди
Россиянинг кўплаб шаҳарларида хабар эълон қилинганидан кейин маҳаллий аҳоли сиёсий маҳбуслар ёдгорликларига гул олиб кела бошлади. Уляновск, Новосибирск, Киров, Томск, Қозон, Ижевск, Псков, Нижний Новгород, Перм, Твер, Киров ва Белгород, Вологда, Толятти, Саратов, Ногинск ва бошқа кўплаб Россия шаҳарлари, жумладан, Москва ва Санкт-Петербург мотам изҳор этмоқда.
17 феврал куни эрталаб ОВД-Инфо нашрининг хабар беришича, Навалний хотирасига бағишланган митингларда камида 200 киши ҳибсга олинган. Ҳибсга олинганларнинг аксарияти Санкт-Петербургда - 69 киши, Нижний Новгородда -15 ва Москвада - 11 киши. Улар полицияга бўйсунмаслик ва оммавий тадбир қоидаларини бузиш моддаларида айбланмоқда.
Алексей Навальний ҳибсга олинишидан олдин яшаган Москванинг Марьино микрорайонидаги уйи ёнида ҳам ясама ёдгорлик пайдо бўлди.
Навальний хотирасига дунё бўйлаб акциялар ўтказилмоқда
Дунёнинг кўплаб мамлакатларида русийзабон диаспоралар Навалний хотирасига митинг ўтказилишини эълон қилди. “Ковчег” ташкилоти тузган рўйхатда 20 дан зиёд мамлакатда шундай тадбирлари бўлиши қайд этилган (рўйхат тўлдирилмоқда). Акциялар асосан Россия консулхоналари ва элчихоналари ёнида бўлиб ўтади.
Тбилисида фаоллар Россия манфаатлари секцияси биноси ёнида акция ташкил қилишди.
Ереванда, “Новай газета.Европа” хабарига кўра, полиция митингчиларни элчихонага киритмаяпти, бино қуршаб олинган.
Прагадаги Россия элчихонаси олдида ўнлаб одам йиғилган.
Шунингдек, Лондондаги Россия элчихонаси ёнида ҳам митингчилар бор.
АҚШда бир қанча митинглар бўлди. Нью-Йоркда одамлар рус ва инглиз тилларида “Путин – қотил”, “Биз таслим бўлмаймиз” деб ёзилган плакатларни кўтарганча Россия элчихонаси ёнига келишди.
Сакраментодаги акцияда юзлаб киши қатнашди: улар, жумладан, Путин портрети ва “Бизга пул тўлашмаган, биз сендан текинга нафратланамиз” деган ёзув туширилган узун плакатни кўтариб келишди.
АҚШнинг бошқа шаҳарларида ҳам одамлар Навалний хотираси ҳурматига кўчаларга чиқдилар.
Акциялар Буэнос-Айрес, Белград, Берлин, Вилнюс ва бошқа кўплаб шаҳарларда ҳам бўлиб ўтди. Айрим мамлакатларда митинглар шанба ва якшанба кунларига белгиланган.
“Сота” нашри хабарига кўра, Минскда тугатилган “Яшиллар” партияси етакчиси Дмитрий Кучук Россия элчихонаси олдига Навалний хотираси учун гул қўяётган чоғида тутиб олиб кетилган.