Андижон вилоят Хўжалик судининг Ҳусанов раислигида 13 январь куни ўтказилган мажлисида “Магнит Савдо Ишонч” МЧЖси устидан ҳукм чиқарилди. Ҳакам 100 одамни иш билан таъминлаб келган ширкатни¸ солиқчилар даъвосини қондириш учун¸ мол-мулкини мусодара қилиш орқали¸ йўқ қилиш ҳақида қарор чиқарди.
Бу ҳақда 13 январь куни маҳаллий вақт билан оқшомги соат 6:30 ларда “Магнит Ишонч Савдо” ширкати эгаси Рафиқжон Исроилов маълум қилди:
- Судъя Ҳусанов ўзи ҳукм ҳақида мужмал гапирди¸ очиғи¸ тушунмадим ҳам. Адвокатим ҳам тушунмади¸ ҳакамдан ҳукм нима ҳақида бўлди¸ қайта такрорланг¸ деб сўради. Охири яна ўзим сўрадим: “Mенга содда қилиб тушунтиринг¸ ҳукм нима ҳақида бўлди. Мол-мулкка қаратдингизми¸ ўртоқ Ҳусанов?” десам ¸ “Ҳа¸ сизнинг ишхонангизга¸ мол-мулкка қаратдик”¸ деди. Мен тушунмай қолдим¸ ë бу одам (Андижон Хўжалик суди ҳаками – таҳр.) телевизор кўрмайди¸ президентимизнинг гапларини эшитмайди ëки президентнинг гапларининг зиғирча аҳамияти йўқ бу судъяга. “Менинг саволим бор¸ ширкатимда қанча ишчи ишлашини биласизми?”¸ десам¸ “Сизга жавоб бермайман”¸ деб¸ тескари қараб чиқиб кетди судъя Ҳусанов¸ дейди Хўжалик суди ҳукмидан шокка тушган андижонлик тадбиркор.
Шавкат Мирзиëев ҳокимиятга келганидан бери билан тадбиркор¸ хусусан¸ ишсизлик қалтис муаммога айланган ҳозирги шароитда давлатдан бир тийин олмасдан¸ ўз маблағини таваккал қилиб бизнес очаëтган¸ хусусан¸ иккитагина иш ўрни яратаëтган тадбиркорни бошда кўтариш давлат сиëстига айланганини қайта-қайта таъкидламоқда.
Бундай баëнотлар¸ Мирзиëев қабул қилган фармон ва қонунлар давлат телеканалларида тинимсиз тарғиб этилаëтгани ортидан ўзбек тадбиркорларида коррупциялашган назорат органлари бедодлигидан қутулиш умиди пайдо бўлди.
2015 йил августида Андижон солиқчиларининг кутилмаган текширувлари ортидан ниҳоятда катта жаримага тортилган¸ бу жаримани вақтида тўлаши ортидан¸ ундан икки баравар каттароқ жарима тўлашга ҳукм этилган "Магнит" ширкати эгаси¸ ўз фаолиятига тўсқинлик қилаëтган солиқ ва суд фаолиятини кўриб чиқишни сўраб Мирзиëев виртуал қабулхонасига мурожаат қилди¸ бу ердан ҳам натижа чиқмагач¸ Мирзиëевга ëрдам сўраб очиқ видеомурожаат қилди.
Бу видеомурожаат ижтимоий тармоқларда кенг тарқалиб¸ ўн минглаб ўзбекистонлик бу судда кимнинг қўли - тадбиркорни ҳимоя қилишга уринаëтган янги президент¸ ëки коррупциялашганини Мирзиëевнинг ўзи ҳам эътироф этаëтган назорат ва адлия тизими баланд келишини кутаëтган эди.
- Кун.уз деган сайтда ҳам мен ҳақимда президентимизнинг тадбиркорни ҳимоя қилиш ҳақидаги гапларини қўшиб мақола ëзишган экан кеча. Мирзиëев худди мен ҳақимда гапиргандек тадбиркорни ҳимоя қилаëтганини эшитиб¸ бугун судга жуда кўтаринки руҳда бордим. Лекин ҳукмдан кейин ҳафсалам мутлақ пир бўлди. Менинг ишхонам кимгадир керак бўлди ва шуни олишди. Мен тўлаган бир миллиард сўм зарардан ташқари қўйилган 3 миллиард 200 миллионнинг 55 фоизини¸ ëки 1 миллиард 700 миллионини тўлаб бўлдим бу кунга қадар. Шу кунга қадар тўлов бир кун ҳам тўхтагани йўқ¸ ҳар куни 5-10 миллион пул тўлаяпман. Мен тушунмаяпман буларга ўзи нима керак! Мен 100 ишчимга жавоб бериб юборишга мажбурман энди. Бор-йўғимни мусодара қиладиган бўлиб туришибди¸ дейди Рафиқжон Исроилов.
Рафиқжон Исроилов суд ҳукмининг ëзма шаклда келаси ҳафта берилиши ва бундан кейин нима қилиш – Мирзиëев сиëсатини назар-писанд қилмасдан ўзи каби тадбиркорни хонавайрон қилиш ниятидан қайтмаëтган солиқчи ва судъялар бедодлигига қарши қаердан¸ кимдан ëрдам сўрашни билмай қолганини айтади.
Зотан¸ тадбиркорнинг солиқчилар даъвоси ва уни қондириш бўйича Андижон вилоят Хўжалик суди чиқарган аввалги ҳукмлар устидан қилган шикоят аризаларига Ўзбекистон Олий Хўжалик суди раиси ўринбосари Исоқов¸ дастлабки суд ҳукмини қўллаш ва уларни кучда қолдириш орқали жавоб қайтарган.
Андижонда музқаймоқ ва бошқа ширинлик маҳсулотлари билан яхши танилган “Магнит” ширкатининг банкротликка олиб келинганини шарҳлаган андижонлик тадбиркорлардан бири¸ унинг нафақат Андижон¸ балки Ўзбекистоннинг аксар ҳудудларидаги сердаромад ширкатларни турли баҳона билан ўзига тортиб олаëтган ниҳоятда қудратли монополист гуруҳ томонидан синдирилганини таъкидлади:
- Бу гуруҳ раҳбарлари Тошкентда ўтирибди ва улар қўлида ниҳоятда қудратли назорат органлари бор. Андижондаги солиқ¸ прокуратура ва суд ходимлари ҳам қонунга эмас¸ ана шу гуруҳ буйруғига бўйсунади. “Магнит” солиқчилар юборилгунга қадар Андижонда энг яхши ишлаëтган¸ пул айланмаси ўз рақиблариникидан бир неча баравар катта бўлган даромадли ширкат эди. Орқасида ҳеч кими йўқ бир тадбиркорнинг бунақа сердаромад ширкатга эга бўлиши¸ монополистга ëқмади. Рейдерлик уюштириб¸ уни синдиришди. Энди уни кимдир сув текинга сотиб оладию¸ шу билан рақибдан ҳам қутулади¸ унинг даромадли бизнесини ҳам қўлига олади¸ дейди ўз ширкати ҳам айни сценарий – назорат органларининг уюштирилган рейди асосида йўқ этилган андижонлик бошқа бир тадбиркор.
Ҳозирда Озодлик бу тадбиркор тилга олган “Андижон ва республиканинг бошқа ҳудудларидаги сердаромад ширкатларини” турли текширувлар уюштириш воситасида синдириш ва улар бизнесини ўз қўлига тортиб олиш билан шуғулланиб келаëтган “қудратли монополист гуруҳ”нинг ноқонуний фаолиятини тасдиқловчи ҳужжатларни тўпламоқда.
Сиз ҳам ўзингизда мавжуд ҳужжатларни тақдим этишингиз мумкин бўлган бу журналистик суриштирув натижалари¸ иддаолар ўз тасдиғини топган тақдирда¸ кенг жамоатчиликка эълон қилинади.
Монополист гуруҳлар¸ назорат органларининг коррупциялашганига оид иддаоларни тасдиқловчи далил-исботларни ozodlikmail@gmail.com электрон почтаси¸ ëхуд Озодликнинг Telegram ва WhatsApp тармоғидаги саҳифасига юборишингиз мумкин.
