Разведка: Россия Исроилдаги воқеалар баҳонасида Украинани ёмонотлиқ қилмоқчи
Украина Мудофаа вазирлиги Разведка бош бошқармаси (РББ) телеграм -каналида эълон қилган баёнотида Россия Исроил-ҲАМАС уруши баҳонасида Украинани ёмонотлиқ қилиши мумкинлигидан хавотир билдирган:
“Россия Украинадаги ҳарбий ҳаракатлар чоғида ўлжа қилиб олинган АҚШ ва ЕИ мамлакатларида ишлаб чиқарилган қуролларни ҲАМАС террорчиларига берган. Кейинги қадам – Украина ҳарбийларини мунтазам равишда Ғарб қуролларини террорчиларга сотишда айблаш бўлади. Ушбу фейклар Кремлнинг дезинформация кампанияси доирасида Ғарб ОАВларида чоп этилажак “фош қилувчи мақолалар” ва “суриштирувлар”га асос бўлиб хизмат қилади”.
Жангарилар Украина ва Ғарб қуролларидан фойдаланаётгани ҳақидаги хабарлар, чунончи, Кремлга оид Mash телеграм-канали томонидан тарқатилмоқда.
Куни кеча ушбу канал фаластинликлар асосан Украинада ишлаб чиқариладиган “Стрела-2” номли зенит қуроллари билан урушаётганини, ЦАХАЛ аскарлари бир жангари гуруҳ омборида Украина ҳарбий бўлинмаларидан бирида тамғаланган РПГ-7 снарядларини топишганини иддао қилди.
Исроил Мудофаа вазири Ғазо бўлгасини батамом қамал қилишни буюрди
Исроил Мудофаа вазири Йоав Галлант Ғазо бўлгасини батамом қамал қилишни буюрди:
“Мен Ғазо бўлгасини буткул қамал қилишга буйруқ бердим. Электр ҳам, озиқ-овқат ҳам, ёқилғи ҳам бўлмайди, бўлга батамом ёпилади. Биз ҳайвонсифат одамлар билан урушяпмиз, шунга яраша муомала қиламиз”.
Бугун Сальвадор президенти, асли фаластинлик Найиб Букеле ҳам ҲАМАС вакилларини “йиртқич ҳайвонлар” деб атаган эди.
Исроил Ғазони сув таъминотидан узди
Исроил Энергетика вазири Исраэл Кац Ғазо бўлгаси сув таъминотидан узилганини эълон қилди.
“Мен Исроилдан Ғазо бўлгасига сув юборишни дарҳол тўхтатишга фармойиш бердим”, дейилади Кац баёнотида.
Мулозим Ғазо бўлгаси электр энергияси ва ёқилғи таъминотидан шанба куниёқ узиб қўйганини қўшимча қилди.
Аввалроқ Исроил Мудофаа вазири Йоав Галлант Ғазо бўлгасини батамом қамал қилишга буйруқ берган эди.
Саакашвили Исроилни қўллашини билдирди
Грузиянинг собиқ президенти Михаил Саакашвили Исроил-ҲАМАС урушида Исроил томонини қўллашини билдирди.
Саакашвили масофавий ўтаётган суд йиғилишида камерага Исроил байроғини кўрсатиб, Исроил билан биргалигини айтди.
Бу ҳолат Грузиянинг Mtavari телеканали репортажи пайти намойиш қилинди.
2021 йил октябрида Саакашвили Грузия чегарасидан яширинча ўтганликда гумонланиб Тбилисида қўлга олинган эди. Шундан сўнг у президентлик даврида ваколатларини суиистеъмол қилганлик айблови билан олти йилга қамалди. Грузияда унга қарши яна бир нечта иш қўзғатилган. Улар орасида чегарадан ноқонуний ўтганлик айблови ҳам бор. Май ойида соғлиғи ёмонлашган собиқ президент клиникага кўчирилганди.