Судланувчилар Ўзбекистон Жиноят Кодексининг 11 моддаси асосида жавобгарликка тортилди
Суд материалларига кўра, Нукус шаҳридаги тартибсизликлар натижасида 6 млрд. 681 млн. 247 минг 508 сўм моддий зарар етказилган.
Нукусликларга Ўзбекистон Жиноят Кодексининг қуйидаги моддалари билан жиноят иши қўзғатилган:
28-модда. Жиноят иштирокчиларининг турлари моддаси орқали 104-модда. Қасддан баданга оғир шикаст етказиш;
104-модда. Қасддан баданга оғир шикаст етказиш;
159-модда. Ўзбекистон Республикасининг конституциявий тузумига тажовуз қилиш;
164-модда. Босқинчилик;
167-модда. Ўзлаштириш ёки растрата йўли билан талон-торож қилиш;
227-модда. Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш;
243-модда. Жиноий фаолиятдан олинган даромадларни легаллаштириш;
244-модда. Оммавий тартибсизликлар;
244−1-модда. Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш;
247-модда. Ўқотар қуролни, ўқ-дориларни, ўқотар қуролнинг асосий қисмларини, портловчи моддаларни, портлатиш воситаларини ёки портлатиш қурилмаларини қонунга хилоф равишда эгаллаш;
277-модда. Безорилик.
20 нафар судланувчига нисбатан «қамоққа олиш», 1 нафарига «уй қамоғи» ва 1 нафарига "жамоа кафиллиги" тарзидаги эҳтиёт чоралари қўлланилган.
Прокуратура айбловларни ўқиб эшиттирди
“Газета.уз” мухбири хабарича, куннинг иккинчи ярмида суд мажлисида прокуратура томонидан 1—2-июл кунлари Нукус воқеаларига алоқадорликда гумон қилинаётган шахсларга қўйилган айблов ўқиб эшиттирилди.
Айблов хулосасида Даулетмурат Тажимуратов ва унинг тарафдорлари Азамат Турданов, Лолагул Каллиханова ва бошқалар Ўзбекистон конституциявий тузумига тажовуз ва бошқа жиноятлар содир этгани айтилди.
Жумладан, прокуратура вакили Конституциянинг 70, 71, 72, 74 ва 75-моддаларига таклиф этилаётган ўзгартиш ва қўшимчаларга ўз норозиликларини билдирганликлари, уни интернет тармоғида кенг тарқатишлари ва фуқароларни тартибсизликларга ташвиқ қилишлари республикада намойишларга сабаб бўлганини таъкидлади.
Судланаётганлар орасида блогер ва журналистлар бор
Судланаётганлар орасида журналист ва блогер Даулетмурат Таджимуратов, Makan.uz сайти асосчиси ва CABAR.asia нашри журналисти Лолагул Каллиханова, "Ayama" веб-сайти маъмури Бахтияр Кадирбергенов, блогер ва жамоатчилик фаоллари Азамат Турданов, Азамат Нуратдинов ва бошқалар бор.
Шу йилнинг 5 июлида Журналистларни ҳимоя қилиш қўмитаси (Committee to Protect Journalists) Лолагул Каллиханова ҳимоясига махсус мурожаат билан чиққан эди.
Судланувчилар нимада айбланмоқда?
28 ноябр кунги суд мажлисида давлат айбловчиси айблов хулосасининг қисқача мазмунини ўқиб эшиттирди. Унга кўра, қорақалпоғистонликларга қуйидаги мазмунда айб қўйилмоқда:
Д. Тажимуратов уюшган гуруҳ ташкил килиб, Қорақалпоғистон Республикасининг амалдаги ҳукуматини ағдариб, ўзини Жўқорғи Кенгес раиси лавозимига тайинлаш мақсадида жорий йилнинг 1-2 июль кунлари оммавий тартибсизликларни ташкиллаштирганликда;
Л. Каллиханова ушбу уюшган гуруҳга бирлашиб, ижтимоий тармоқлар орқали сепаратизм ғоялари билан йўғрилганликда, аҳолини оммавий тартибсизликка даъват қилувчи материалларни тарқатиб келганликда;
А. Турданов 1-2 июль кунлари Нукус шаҳридаги оммавий тартибсизликларда спортчиларни иштирок этишини таъминлаган ва Д. Тажимуратовни елкасига ўтказиб, Жўқорғи Кенгесни эгаллаш мақсадида олиб борганликда;
А. Сметуллаев ва Д. Джиемуратов 1-2 июль кунлари Қорақалпоғистон Республикаси туманларидан одамларни оммавий тартибсизликларга жалб қилганлик ва ўзи ҳам фаол иштирок этиб, Д. Тажимуратовни қўллаб-қувватлаганликда;
Б. Кадирбергенов одамларни оммавий тартибсизликка жалб қилиб, Жўқорғи Кенгес ва Нукус халқаро аэропорти биноларини босиб олишга даъват қилганликда;
Б. Сейтниязов Қозоғистон Республикасидаги "Аллаяр жолы" диаспора аъзоси бўлиб, оммавий тартибсизликларни ташкиллаштиришга ва Д. Тажимуратовни қўллаб-қувватловчи баннерлар тайёрлашга ёрдам берганликда;
А. Тоқимбетов 2 июль куни Хўжайли туманида йиғилган одамларга Қорақалпоғистон Республикаси мустақил бўлиши лозимлигини маълум қилиб, уларни оммавий тартибсизликка даъват қилиб, уларга етакчилик қилганликда;
Қ. Сейтимов 2 июль куни Қораўзак туманида одамларни тўплаб, уларни оммавий тартибсизликларга жалб қилиб, уларга етакчилик қилганликда;
А. Нуратдинов 2 июль куни Қонликўл туманида одамларни оммавий тартибсизликларга даъват қилувчи материалларни тарқатиб келиб, оммавий тартибсизликларда етакчилик қилганликда;
С. Медетов 2 июль куни Шуманай туманида одамларни оммавий тартибсизликларга даъват қилувчи материалларни тарқатиб келиб, оммавий тартибсизликларда етакчилик қилганликда;
Н. Найыпов 2 июль куни оммавий тартибсизликларга даъват қилувчи видеомурожаат тайёрлаб, уни ижтимоий тармоқлар орқали тарқатганликда;
П. Шамшетов 2 июль куни одамларни оммавий тартибсизликларга жалб қилган ва ўзи ҳам уларда фаол иштирок этганликда;
Р. Бекмуратов 2 июль куни “Наупир” МФЙ ҳудудида оммавий тартибсизликни бартараф этиш учун сафарбар қилинган Миллий гвардия ходимларига ҳужум қилиб, уларга тан-жароҳат етказиб, “ПМ” маркали пистолетини олиб қўйганликда;
С. Каипов 2 июль куни “Наупир” МФЙ ҳудудида оммавий тартибсизликни бартараф этиш учун сафарбар қилинган Миллий гвардия ходимларига ҳужум қилиб, уларга тан-жароҳат етказган. Бундан ташқари, сепаратизм ғоялари билан йўғрилган видеомурожаат тайёрлаб, уни тарқатиш мақсадида сақлаб келганликда;
Б. Генжебаев 2 июль куни Шуманай туманида оммавий тартибсизликларда Фарғона вилоятидан келган ўзбек миллатига мансуб 3 нафар шахсни тўхтатиб, уларга тан-жароҳати етказиб, 3,6 млн. сўм миқдоридаги пулларини ва қатъий ҳисобдаги ҳужжатларини босқинчилик йўли билан олиб куйганликда;
С. Калилаев 2 июль куни Кегейли туманида оммавий тартибсизликларга етакчилик қилиб, миллатчилик замирида Андижон вилояти ҳокимлиги ШТАБига ўт қўйиб, мулкларини нобуд қилганликда;
П. Нурниязов 2 июль куни Нукус шаҳрида оммавий тартибсизликларда ҳуқуқни муҳофаза қилувчи орган ходимлари фаолиятини чеклаш мақсадида йўлларни тўсиб, автошина ёқишда етакчилик қилганликда;
С. Калимов 1 июль кунидаги оммавий тартибсизликлар учун маъмурий қамоққа олинганларни озод қилиш мақсадида уларни сақлаш жойига ҳужум қилиб, ўт қўйганликда;
Н. Султамуратов 2 июль куни Нукус шаҳар ИИО ФМБга қилинган ҳужумда фаол иштирок этиб, дарахт ёқиб, йўлларни тўсганликда;
А. Темирханов 2 июль куни оммавий тартибсизликларда Хўжайли гузари кўчасида “Молотов коктейли”дан фойдаланиб, ҳуқуқни муҳофаза қилувчи орган ходимлари фаолиятига қаршилик қилганликда;
А. Адилбеков 2 июль куни оммавий тартибсизликларда Тўрткўл гузари кўпригида “Молотов коктейли”дан фойдаланиб, ҳуқуқни муҳофаза қилувчи орган ходимлари фаолиятига қаршилик қилганликда.
Форум