Термиз шаҳрининг Бўстон маҳалласида яшайдиган ва "10 йилдан буён бозорда сузма сотиб, кун кўрадиган ёлғиз она" – 51 яшар Ражабой Холназарованинг Озодлик мухбирига айтишича, уни йиллардан буён қийнаб келаёган асосий муаммо – уйсизликдир.
Ражабойнинг Озодликка айтишича, 2017 йилнинг кузида у тўплаган бор пулига кўтарган қарзларини қўшиб ҳимояга муҳтож қишлоқ аҳолиси учун махсус қурилаётган арзон уйлардан олишга ҳаракат қилган.
- 12 ярим миллион сўм пулни банкка олиб бориб, топширдим. Яна озгина тўлов қилинг, дейишди. Аммо, менинг бошқа имконим йўқ эди - вилоят ҳокимига бордим. Ўша кезда Эркин Турдимов ҳоким эди. У киши сизга уй берилади, ёрдам қиламиз, деди. Кейин уй қуриб битказилди, аммо менга беришмади, - деб даъво қилади Холназарова.
Браузерингиз HTML5 ни қўллаб- қувватламайди
Термизда ёлғиз онадан пулни олишди, аммо президент атаган арзон уйни беришмади
Шикоят қилишича, Ражабой Холназаровага ваъда қилинган уй берилмаган, дастлабки тўлов учун берган 12 ярим миллион сўм пули эса 1 ярим йилча банкда қолиб кетган.
Ражабойнинг айтишича, эндиликда унга пулини қайтаришмоқчи, аммо у бунча вақтдан сўнг пул қайтарилишини эмас, уй берилишини талаб қилмоқда.
Озодликка айтишича, унинг доимий иши йўқ, бунинг устига уйи ҳам йўқ. Ёлғиз ўғли ва ўзи навбатма-навбат опа-сингилларининг уйида яшайди.
Браузерингиз HTML5 ни қўллаб- қувватламайди
Ёлғиз она: 10 йил қатиқ сотиб йиққанимни банкка тўладим, аммо президент атаган арзон уйни менга беришмади
Термиз шаҳри ҳокимиятидан олинган маълумотга кўра, раҳбарият Ражабой Холназарованинг аҳволидан хабардор, унинг шикояти ҳокимликнинг уй-жой билан таъминлашга масъул бўлимида қабул қилинган.
Аммо, муаммо ечимини топдими ёки яқин-атрофда ҳал бўладими, деган саволга Озодлик шаҳар ҳокимлигидан расмий жавоб ололмади.
Аслида, Ражабой Холназаровага Вазирлар Маҳкамасининг 2018 йил 9 февралда қабул қилинган 103-сонли қарори асосида Термиз шаҳрида қурилаётган 432 та 3 қаватли уйлардан бирида арзон нархдаги квартира ваъда қилинган.
Қарорга мувофиқ:
- бошқа оила ёхуд бошқа оилалар билан бир уйда (бир квартирада) биргаликда яшовчи оила;
- кўп болали оилалар;
- тўлиқ бўлмаган оилада болани (болаларни) тарбиялаётган оналар (оталар);
- даромади юқори бўлмаган (1 ойдаги жами даромади ҳар оила аъзосига белгиланган энг кам ойлик иш ҳақининг 3 баравари миқдоригача тўғри келадиган оилалар)
Рўйхатдаги оилалар туман ҳокимликларида ташкил этилган махсус комиссия тавсияси билан қишлоқ жойларда янгиланган намунавий лойиҳалар билан арзон уй-жойлар қуриш дастурида иштирок этиши мумкин.
Холназарова эса – юқорида тилга олинган тоифаларнинг қарийб барчасига тўғри келади – бошқа оила билан яшайди, тўлиқ бўлмаган оилада 1 болани тарбия қилган, даромади юқори бўлмаган оилада ҳам ота, ҳам онадир.
Ижтимоий ҳимояга муҳтож ёлғиз аёл - Холназарова дастлабки тўловини бажарган уй қани – бу саволга расмийлардан жавоб йўқ.
Термиз шаҳар ҳокимлигидан олинган маълумотга кўра, айни пайтда шаҳарда яшовчи ногирон ёки ижтимоий ҳимояга муҳтож аҳволда қолган 7 минг кишидан имтиёзли асосда уй-жой олиш учун ариза тушган. Аммо, бу йил фақат 6 уй имтиёзли уй ажратилган.
Имтиёзли дейиларкан, ижтимоий ҳимояга муҳтож кишиларга ипотека кредити учун дастлабки 25 фоизлик тўловни тўлашда ҳокимият ёрдам беради.
Расмий маълумотга кўра, бунинг учун махсус ажратилган маблағ йўқ - жамоат жамғармалари, ҳомийлар, бошқа жамғармалар ҳисобидан тўлаб берилади. Қолган 75 фоизини талабгорнинг ўзи тижорат банклари берадиган имтиёзли кредит ҳисобидан тўлаши керак.