Муддатидан илгари мухолифатсиз президентлик сайлови бошланди
9 июль куни ўзбекистонликлар мамлакат тарихидаги илк муддатидан илгари президент сайловида овоз бермоқда.
Навбатидан илгари сайлов шу йилнинг 30 апрель куни ўтган конституцион референдум натижаларига кўра белгиланди. Референдум, расмийларга кўра, амалдаги президент муддатини автоматик тарзда ноллаштирди.
Сайловда тўрт номзод:
Ўзбекистон Халқ демократик партиясидан Улуғбек Илясович ИНОЯТОВ,
Тадбиркорлар ва ишбилармонлар ҳаракати – Ўзбекистон Либерал-демократик партиясидан амалдаги президент Шавкат Миромонович МИРЗИЁЕВ,
Ўзбекистон “Адолат” социал-демократик партиясидан Робахон Анваровна МАХМУДОВА,
Ўзбекистон Экологик партиясидан Абдушукур Худойқулович ХАМЗАЕВ иштирок этмоқда.
Сайловда мухолифатдан номзод йўқ, ўз номзодини қўйишга ҳаракат қилган Хидирназар Аллақуловнинг "Ҳақиқат ва бирдамлик социал демократик партияси" Адлия вазирлиги томонидан имзолар етишмаслиги важи билан рўйхатга олинмади.
Марказий сайлов комиссияси хабарига кўра, Тошкент вақти билан соат 11га қадар 6,4 млн киши, яъни сайловчиларнинг 33,54 фоизи овоз бериб бўлган. Сайловчиларнинг энг кам давомати Тошкент шаҳрида кузатилган.
«Ушбу рақамлар Марказий сайлов комиссияси томонидан муддатидан илгари Ўзбекистон президенти сайлови ўтган, деб ҳисоблашга асос бўла олади. Якуний хулоса овоз бериш натижаларидан келиб чиқиб берилади», — деди МСК раиси ўринбаси Баҳром Қўчқоров.
Шавкат Мирзиёев оиласи билан бўлажак президент ким бўлиши учун овоз берди
Сайловда амалдаги президентнинг жуда катта фарқ билан, ғолиб бўлиши айтилмоқда. Озодлик ўтказган сўровларга кўра, аксарият сайловчилар бошқа номзодларни яхши танимайди ва уларнинг бу сайловда ҳатто ўн фоиз овоз олиш имкони йўқ.
Президент муддатини ноллаштириш кўзда тутилган Референдум ўтказилганидан сўнг, Шавкат Мирзиёев янги президентлик сайлови ўтказилишини эълон қилди.
Аммо бу сайловда бирорта ҳам мухолиф номзод иштирок этмаяпти.
Сайловга бормаган аёллар