Тошкент ва Жиззах вилоятларининг хокимлари тайинланганидан 10 ой ўтиб лавозимларидан олинди. Озодлик манбаларига кўра, ҳокимларнинг ишдан олинишига 2017 йилги пахта мавсумида ушбу вилоятларда пахта ҳосилини қўшиб ёзишга йўл қўйилгани сабаб бўлган. Мажлисда қатнашганлардан бирининг Озодликка айтишича, Жиззах ҳокими қўшиб ёзганини "Шароф Рашидовнинг юз йиллиги учун юртбоши келишига уялиб қолмаслик учун" қилинган ҳаракат сифатида изоҳлаган.
Фарғона вилоятининг Ёзёвон тумани ҳокимияти яқинидаги чорраҳада 30 октябрь кечқурун содир бўлган автоҳалокатда бир аёл нобуд бўлди, тўрт киши жароҳат олди. Воқеа гувоҳларининг айтишича, чорраҳада пахта ташийдиган икки прицепли тракторга Cobalt автомашинаси қаттиқ урилган. Оқибатда автомобилда бўлган бир аёлнинг боши танасидан узилиб кетган, қолганлар турли хил жароҳат билан касалхонага ётқизилган.
Андижон вилояти Балиқчи тумани мактабларининг бошланғич синф ўқувчилари дарсдан бўш пайтда пахта териб келишга мажбурланяпти. Ота-оналарнинг Озодликка айтишича, мактабларнинг юқори синф ўқувчиларидан беш-олти нафари ҳам пахта теримига чиқариляпти. Ўқитувчилар ҳеч қайси йили пахта теримида бундай қаттиқ сиёсат кузатилмаганини айтади.
Андижон шаҳридан Тошкент вилояти туманларига пахта теримига мажбуран поездда олиб келинган теримчилар, ҳокимиятнинг йўлкира бепул бўлиши ҳақидаги ваъдаларига қарамай, улардан "поезд ҳақи" ушлаб қолинаётганидан шикоят қилди. Тошкент вилоят ҳокимлиги мулозими Озодликка теримчилар махсус поездда ташилгани ва бунинг учун теримчилардан пул олинмаслигини айтди.
Наманган шаҳридаги барча мактаб ўқитувчиларининг учдан бир қисми уч ҳафтадан буён кунлик пахта теримига олиб чиқиляпти. Бундан ташқари ўқитувчиларнинг бир қисми ётоғи билан пахта теримига юборилган. Вилоят ҳокимидан бу йил пахтага чиқарилмаслик ваъдасини олган ўқитувчилар, ҳокимнинг ўз сўзида турмаганлигини айтмоқда.
Самарқанд давлат университетининг ижтимоий-иқтисодиёт факультети талабаси Дилкаш Хуррамов Пастдарғом туманига пахта теримига мажбуран олиб кетилаётган пайтда автобусдан ўзини ташқарига улоқтирган. Бу ҳақда Озодликка хабар берган талабаларнинг айтишларича, Дилкаш Хуррамов бир қанча жароҳатлар билан касалхонага ётқизилган.
Шаҳрисабз туман ҳокимлиги пахта штабидаги мулозимлар пахта режасини бажармай, бозорда бодринг сотаëтган фермерларни 18 октябрь кунги пахта теримига бағишланган мажлисда танқид қилишди. Бу танқид ортидан бир неча фермер тунни Шаҳрисабз туман ИИБ изоляторида ўтказган. Улар орасида аëл фермерлар ҳам бор.
Институт ўқитувчиларининг Озодликка ёзишича, олийгоҳ ректори уларни пахта теримига мардикор ёллашга мажбур қилмоқда. Мардикор ёллаш учун пул бермаганларга эса ишдан бўшатиш билан таҳдид қилинмоқда. Институт раҳбарият бу хабарларни инкор қилишга уринди.
Андижон вилоятидан ўқитувчи ва шифокорлар доҳил ўн мингдан зиёд одам махсус поездларда Тошкент вилоятининг Тўйтепа, Бўка, Чиноз туманларига пахта теримига сафарбар этилди. Теримчилар сўнгги беш кун давомида “Ўзбекистон темир йўллари” ширкатининг поездларида Тошкент вилоятига ташилган. Поездлар теримчи ташишга жалб этилгани сабаб Андижон-Тошкент йўналиши бўйича йўловчи поезди қатнови вақтинча тўхтатилган.
GM Uzbekistan матбуот марказининг ўзини таништирмаган мулозими Озодлик мухбирига завод ишчиларининг фақат кичик бир қисми меҳнат таътили ҳисобидан пахта теримида қатнашаëтгани ва бу ҳолат корхонанинг умумий иш суръатига зарар келтирмаётганни айтди. Мулозимга кўра¸ завод ишлаяпти ва конвейер тўхтамаган.
Андижон вилоятининг Марҳамат туманидаги мактаблардан бирида туман Халқ таълими бўлими мулозими мактаб раҳбарлари ва ўқитувчиларини пахтага пул бермаётгани учун тергаётгани акс этган видео Озодликка келиб тушди. Видео тасвирда ўрта ёшлардаги аёл пахтага теримчи ёллаш учун пул бермаган ўқитувчиларга оқибати ёмон бўлиши ҳақида пўписа қилади, ҳар биттасини дарсига кириб, ишидан камчилик топиши мумкинлиги ҳақида огоҳлантиради.
Давомини ўқинг
