Андижон вилояти ҳокими Шуҳратбек Абдураҳмонов 22 сентябр куни вилоят ҳокимлигида ўтказилган мажлисда мактаб ва коллеж ўқитувчилари, ўқувчи ва талабалари ҳамда тиббиёт ходимларининг дала меҳнатига жалб этилиши жиноят экани, бундай хол аниқланган тақдирда ходимларни далага чиқарган раҳбарлар нафақат лавозимидан айрилиши, балки жиноий жавобгарликка тортилиши ҳақда огоҳлантирди.
Бу ҳақда КUN.UZ нашри 22 сентябрга ўтар кечаси хабар тарқатди. Нашрнинг ёзишича, ишончли манба Бош вазир Абдулла Арипов 22 сентябрь соат 17.00га қадар пахтага чиқарилган талабалар, ўқитувчилар ва тиббиёт ходимларини уйларига қайтариш бўйича кўрсатма бергани тўғрисида маълум қилган.
Қашқадарёдаги айрим мактабларнинг юқори синф ўқувчилари бир ҳафтадирки, пахта теримига жалб қилинди. Ўқувчилар ва улар ота-оналарининг айтишича, болалар мактабда икки соат ўқигач, далага ҳайдалмоқда. Андижонда эса ўқувчилар ўрнига уларнинг ота-оналари пахтага чиқишга мажбурланмоқда.
Ўзбекистонда мажбурий меҳнатга барҳам берилаётгани тўғрисида турли минбарлардан айтилаётган гаплар кўпаяётгани баробарида шундай меҳнатга мажбурланаётганлар, хусусан, талабалардан “пахтага ўз хоҳишим билан чиқаман”,"толани оғзимга солмайман"¸"чаноқда қолдирмай тоза тераман" деган мазмунда тилхат олиш ҳолатлари ҳам кўпаймоқда.
19 сентябрь куни Фарғона вилояти Ўзбекистон туманидаги 43-боғчада 2 яшар Абдуллоҳ устига бир қозон қайноқ овқат тўкилиши оқибатида оламдан ўтди. Боғчада ошпаз бўлиб ишлайдиган Гулнора Раҳмонова ўғлига қарайдиган қайнонаси пахта теримига чиқарилгани боис, боласини ўзи билан боғчага олиб борган пайти ушбу фожиа содир бўлган.
Ўзбекистонлик олим, Ойбек Кимсанбоев, Россия иқлими шароитида дунёда илк бор рангли пахта навини яратишга муваффақ бўлганини айтади.
Жиззах вилоят, Шароф Рашидов туман, "Уч тепа" даҳасидаги 32- мактабида Ёшлар иттифоқи ташкилотчиси бўлиб ишлайдиган 39 яшар Гулзода Тожибоева пахтадан қайтаëтганида автобус тагида қолиб ўлди. Воқеа гувоҳи бўлган учтепалик ўқитувчининг Озодликка айтишича¸ Гулзода Тожибоева терган пахтасини топшириб уйига қайтаëтган пайтда йўл-транспорт ҳодисасига учраган. Воқеа юзасидан Рашидов туман ИИБ тарафидан жиноят иши очилган.
Андижон шаҳрида яшовчи 58 ёшли Музаффар Умрзоқов мактабда фаррош бўлиб ишлайдиган рафиқаси ўрнига пахтага чиққан пайтда далада жон берди. Воқеа гувоҳларининг Озодликка айтишича, Умрзоқов терган пахтасини прицепга олиб бораётган маҳал юрак хуружидан ўлган. Марҳумга шу куни кечқурун жаноза ўқилиб, зудликда дафн этилган.
Андижон вилоят ҳокими 16 сентябрь, шанба куни кечқурун ўтказган селектор йиғилишида ҳар бир имомга намозхонлар ва маҳалла аҳлидан 10-15 кишилик теримчилар гуруҳи тузиш вазифаси юклатилди.Чинозлик мактаб директорининг айтишича, ҳашарчиларни уюштириш билан Ёшлар иттифоқининг мактабдаги вакили шуғулланмоқда.
Жиззах, Самарқанд, Қашқадарё, Андижон, Тошкент вилоятларида мактаб, коллеж, лицей ўқитувчилари, боғча тарбиячиларининг пахта теримига ётоққа жўнатилаётгани хабар қилинмоқда. Самарқанд ва Фарғона вилоятларидан Озодликка боғланган тадбиркорлар улардан 300-350 минг сўмдан пахта теримига, дея пул йиғилаётганидан арз қилди.
"Фидоий ёшлар" отряди тузиш ташаббусини, Sputnik нашрининг хабар қилишича, Ўзбекистон Ёшлар Иттифоқи ташкилоти илгари сурган. Хабарда айтилишича, отряд сафига 50 мингдан ортиқ "уюшмаган ёшлар" бириктирилган ва улар шу кунгача 4 минг 700 тоннадан ортиқ пахтани териб улгурган.
Давомини ўқинг
